जळगाव मिरर | 19 ऑगस्ट 2026
शहरातील शनि पेठ पोलिस स्थानकाच्या हद्दीतून एक खळबळजनक बातमी समोर आली आहे. तयार केलेले १७५. ५३४ तोळे वजनाचे सोन्याचे दागिने घेऊन गेल्यानंतर त्या बदल्यात सोन्याची लगड अथवा पैसे न देता मध्यस्थी व्यापारी पसार झाला. यातून सुवर्ण कारागिराची तब्बल २ कोटी ४५ लाख ७४ हजार ७६० रुपयांमध्ये फसवणूक झाल्याचा प्रकार उघडकीस आला आहे. ही घटना ऑक्टोंबर २०२५ ते मे २०२६ या दरम्यान घडली. या प्रकरणी विद्युत बाग व राजू बिपीन चौधरी या बंगाली व्यापाऱ्यांविरुद्ध शनिपेठ पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, पश्चिम बंगाल येथील सोने कारागीर नबाकुमार गौरहरी धारा (वय ४१) हे शनिपेठ परिसरात वास्तव्यास असून ते सोळा वर्षापासून जळगावात सोनारी काम करतात. जळगावात राहणारे पश्चिम बंगाल येथील विद्युत घोष, देवाशिष सामंता यांच्यासोबत धारा परिचय असून ते चांगले मित्र देखील होते. त्यांच्यामध्ये सोने व सोनारी कामाचे व्यवहार देखील होते. दोघे जण नबाकुमार धारा यांना सोने देवून त्यांच्याकडून सोन्याचे दागिने तयार करवून घेत होते. दीड वर्षापासून विद्युत वाघ यांचा शालक राजू चौधरी हा मध्यस्थ व्यापारीचे काम करीत होता. सोने करागिराकडून दागिने घेवून तो मार्केटमध्ये विक्री करीत होता.
सोने कारागिर नबाकुमार धारा हे गावाला असतांना फोनवर व्यवहार केले होते. त्यांनी व्यवहाराची रक्कम ही २४ कॅरेट सोन्याची लगड घेवून देतो असे सांगत दुकानातून सोन्याचे दागिने घेवून गेला होता. दि. ३० मे रोजी धारा हे घरी परतल्यानंतर त्यांनी विद्युत बाघ याचा मोबाईल बंद येत असल्याने त्याच्या घरी गेले. मात्र मिळून आला नाही. त्यानंतर बाजारात पसरलेल्या बातमीनुसार विद्युत वाघ व त्याचा शालक राजू चौधरी हे परिवारासह पळून गेल्याचे धारा यांना समजले.
आपली फसवणुक झाल्याचे कळताच नबाकुमार गौरहरी धारा यांनी शनिपेठ पोलीसात तक्रार दिली. त्यानुसार दि. १७ ऑगस्ट रोजी विद्युत निरोध बाघ (मूळ रा. केसाडाल, पो स्टे चंद्रकोना टाऊन, जि. मोदिनीपुर, पश्चिम बंगाल, ह.मु. शनिपेठ) त्याचा शालक राजू बिपीन चौधरी (रा. किस्मत नाराजोल पोस्टे दासपुर, ता. घाटाल, जि. मोदीनीपूर, पश्चिम बंगाल) यांच्याविरुद्ध २ कोटी ४५ लाख ७-हजार रुपयांची फसवणुक केल्याप्रकरण गुन्हा दाखल करण्यात आला आहे. तपास पोलीस निरीक्षक डॉ. विशाल जयस्वाल करीत आहे.
ऑक्टोंबर २०२५ पासून विद्युत वाघ याला वेळोवेळी धारा यांनी ८३९.२२० ग्राम वजनाचे २२ कॅरेट शुद्धतेचे सोन्याचे दागिने विक्रीसाठी दिले होते. तसेच राजू चौधरी याला ४०१.३२० व ५१४.८०० ग्राम असे एकूण दोघ जणांना सुमारे २ कोटी ४५ लाख ७४ हजार रुपये किंमतीचे १७५५.३४० ग्राम दागिने दिले होते.
