जळगाव मिरर | २९ मे २०२६
बकरी ईदच्या सुट्टीसाठी गावी आलेल्या एका २० वर्षीय तरुणाचा चाळीसगाव तालुक्यातील पिराचे बोरखेडा येथील धरणात बुडून दुर्दैवी मृत्यू झाल्याची घटना गुरुवारी दुपारी घडली. या घटनेमुळे परिसरात हळहळ व्यक्त होत असून कुटुंबीयांवर दुःखाचा डोंगर कोसळला आहे. मोईन जाकीर झारेकरी (वय २०) असे मयत तरुणाचे नाव असून तो मालेगाव येथे वैद्यकीय शिक्षण घेत होता. बकरी ईदच्या सुट्टीनिमित्त तो शहरातील घाट रोड परिसरातील आपल्या घरी आला होता.
मिळालेल्या माहितीनुसार, गुरुवारी दुपारी सुमारे २ वाजेच्या सुमारास मोईन हा आपल्या चार मित्रांसह पिराचे बोरखेडा येथील धरणात पोहण्यासाठी गेला होता. त्याच्यासोबत शेख मुनीब (वय २०), रेहान सय्यद (वय २०), अल्तमाश शेख (वय २४) आणि जायद शेख हे मित्र उपस्थित होते. धरणात उतरल्यावर मोईनचा पाण्याचा अंदाज चुकला आणि तो खोल पाण्यात गेला. पोहता न आल्याने अथवा खोल पाण्याचा अंदाज न आल्यामुळे तो पाण्यात बुडाल्याची माहिती समोर आली आहे. घटना लक्षात येताच त्याच्या मित्रांनी आरडाओरडा करत मदतीसाठी धाव घेतली.
घटनेची माहिती मिळताच स्थानिक नागरिक, ग्रामस्थ आणि मित्रांनी तातडीने शोधमोहीम सुरू केली. जवळपास तीन तासांच्या अथक प्रयत्नांनंतर सायंकाळी ६ वाजेच्या सुमारास मोईनचा मृतदेह बाहेर काढण्यात यश आले. मृतदेह धरणातील गाळात अडकला असल्याने बचावकार्याला मोठा वेळ लागल्याचे सांगण्यात आले.
या बचाव मोहिमेत नगरसेवक अनिल ठाकरे, संभा जाधव, फकीरा मिर्झा, बाबा ठेकेदार, मुकेश चौधरी, उपनगराध्यक्ष हर्षल चौधरी, रोशन जाधव, वसीम मास्टर, अकरम मिर्झा, नासिर शेख, शाहिद मिर्झा, नगरसेवक वसीम शेख, नगरसेवक इम्रान शेख यांच्यासह अनेक मुस्लिम बांधव व ग्रामस्थांनी सक्रिय सहभाग घेतला. या दुर्दैवी घटनेमुळे परिसरात शोककळा पसरली असून मोईनच्या अकाली निधनाने सर्वत्र हळहळ व्यक्त होत आहे.
