जळगाव मिरर | १२ जून २०२६
यावल तालुक्यातील सातपुड्याच्या कुशीतील माथन या आदिवासी पाड्यावर राहणाऱ्या दांपत्याचा घरी परतत असताना नदीच्या डोहात बुडून मृत्यू झाल्याची दुर्दैवी घटना उघडकीस आली आहे. बुधवारी सकाळी नागरिकांना दोघांचे मृतदेह आढळून आल्यानंतर ही घटना समोर आली. या प्रकरणी यावल पोलीस ठाण्यात अकस्मात मृत्यूची नोंद करण्यात आली असून परिसरात हळहळ व्यक्त केली जात आहे.
मिळालेल्या माहितीनुसार, माथन येथील रहिवासी थावरा उर्फ भावऱ्या रजान पावरा (वय ५४) व त्यांची पत्नी धोंडीबाई थावरा उर्फ भावऱ्या पावरा (वय ३२) हे मंगळवारी बाजारासाठी बाहेर गेले होते. बाजार आटोपल्यानंतर दोघांनी मद्यप्राशन केले होते. त्यानंतर ते आपल्या गावी परतण्यासाठी निघाले. रात्रीच्या अंधारात गाडऱ्या शिवारातून जात असताना पाच्या पावरा यांच्या शेताजवळील नदीच्या डोहाजवळ त्यांचा तोल गेला. रस्त्याचा अंदाज न आल्याने दोघेही पाय घसरून थेट डोहात पडले. पोहता न आल्याने बाहेर पडता न आल्याने दोघांचाही पाण्यात बुडून मृत्यू झाल्याचा प्राथमिक अंदाज व्यक्त करण्यात येत आहे.
बुधवारी सकाळी परिसरातील नागरिकांना नदीच्या डोहात मृतदेह तरंगताना दिसले. त्यानंतर पोलिसांना माहिती देण्यात आली. घटनास्थळी दाखल झालेल्या पोलिसांनी पंचनामा करून मृतदेह ताब्यात घेतले. शवविच्छेदनानंतर मृतदेह नातेवाईकांच्या ताब्यात देण्यात आले. या घटनेमुळे माथन पाड्यासह संपूर्ण परिसरात शोककळा पसरली असून दांपत्याच्या अचानक झालेल्या निधनामुळे नातेवाईक व ग्रामस्थांमध्ये हळहळ व्यक्त केली जात आहे. याप्रकरणी यावल पोलीस ठाण्यात अकस्मात मृत्यूची नोंद करण्यात आली असून पोलीस निरीक्षक रंगनाथ धारबळे यांच्या मार्गदर्शनाखाली पोलीस नाईक वसीम तडवी पुढील तपास करीत आहेत.
