जळगाव मिरर | २८ मे २०२६
पाचोरा तालुक्यातील निंभोरी येथील तीन विद्यार्थी पाचोरा येथे आयटीआयला अॅडमिशन घेण्यासाठी आले होते. दरम्यान, घरी परत जाताना मागाहून येणाऱ्या भरधाव इटिंगा या चारचाकी वाहनाने दुचाकीला मागून जबर धडक दिली. या अपघातात एक विद्यार्थी ठार झाला, तर दोघे जखमी झाल्याची घटना घडली. जखमींवर पाचोरा येथील खासगी रुग्णालयात उपचार सुरू आहेत. ठार झालेला विद्यार्थी एकुलता एक मुलगा असल्याने परिवारावर मोठे संकट कोसळले असून यामुळे परिसरात शोककळा पसरली आहे.
मिळालेल्या माहितीनुसार, निंभोरी येथील तुषार मधुकर नलावडे (वय १७), हरीष रवींद्र मोहिते (वय १८) व हर्षल सुनील देशमुख (वय १८) हे तिघे विद्यार्थी सकाळी १० वाजता घरून पाचोरा येथील खासगी आयटीआयमध्ये अॅडमिशन घेण्यासाठी होंडा कंपनीच्या दुचाकी (एमएच १९,बीएच-७५६८) ने पाचोरा येथे आले होते. आपले काम आटोपून दुपारी १२ वाजेच्या सुमारास घरी परत जात असताना पाचोरा येथील औद्योगिक वसाहती जवळ असलेल्या महादेव मंदिरासमोर पाचोरा आगाराची बस येत होती. याचवेळी इर्टीगा कार (एमएच. ०१, बीएफ. ६५२८) ने बसला ओव्हरटेक करण्याचा प्रयत्न या विद्यार्थी तरुणांच्या दुचाकीला मागाहून जबर धडक दिली. त्यामुळे झालेल्या अपघातात दुचाकी चालक तुषार मधुकर नलावडे याच्या डोक्याला गंभीर इजा झाली. त्यामुळे त्यास तत्काळ पाचोरा येथील खासगी रुग्णालयात उपचारासाठी दाखल केले.
परंतु, डॉक्टरांनी त्यास जळगाव येथे हलवण्याचा सल्ला दिला. दरम्यान, जळगाव येथे उपचारार्थ नेत असताना तुषार नलावडे या तरुणाचा दुर्दैवी मृत्यू झाला. तर या अपघातात दुचाकीवरील हरीश रवींद्र मोहिते याचा एक पाय फ्रेंकर झाला असून हर्षल सुनील देशमुख या विद्यार्थ्याला किरकोळ इजा झाली आहे. या दोघांवर पाचोरा येथील खासगी रुग्णाला उपचार सुरू आहेत. या प्रकरणी पाचोरा पोलीस ठाण्यात अपघाताचा गुन्हा दाखल करण्यात आला आहे. मयत तुषार नलावडे यांचे शवविच्छेदन ग्रामीण रुग्णालयाचे वैद्यकीय अधिकारी डॉ. अक्षय सोनवणे यांनी केल्यानंतर सायंकाळी निंभोरी येथे त्यांच्यावर शोकाकुल वातावरणात अंत्यसंस्कार करण्यात आले. दरम्यान, मयत तुषार नलावडे हा एकुलता एक मुलगा असल्याने नलावडे परिवारावर दुखाचा डोंगर कोसळला असून निंभोरी गावासह परिसरात शोककळा पसरली आहे.
