जळगाव मिरर / २० मार्च २०२३
जिल्ह्यात दोन दिवसापासून अवकाळी पाऊस असल्याने अनेक भागात पाणी साचले आहे तर काही ठिकाणी वीज खांबावर असलेल्या विद्युत तारांमध्ये प्रवाह उतरल्यानंतर त्याचा धक्का लागल्याने शहरातील एका ५ वर्षीय मुलीचा दुर्दवी मृत्यू झाल्याची घटना घडली आहे. या घटनेने जळगाव शहरात हळहळ व्यक्त केली जात आहे. या प्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली.
जळगाव शहरातील निमखेडी परिसरातील रहिवासी असलेल्या महेंद्र बाविस्कर यांच्या ५ वर्षीय मुलगी धनवी ही सोमवारी गल्लीतील लहान मुलांसोबत खेळत असताना लोंबकलेल्या एका विद्युत तारेला चिमुकलीचा स्पर्श होताच तिला विजेचा जोरदार धक्का लागला. या अपघातात ती गंभीर जखमी झाल्याने जिल्हा शासकीय वैद्यकीय महाविद्यालयात दाखल करण्यात आले मात्र वैद्यकीय अधिकारी डॉ.चंदन महाजन यांनी तपासणीअंती तिला मृत घोषित केले. हे ऐकताच आई-वडीलांनी मन हेलावणारा आक्रोश केला. मयत चिमुकलीचे वडील महेंद्र छगन बाविस्कर हे हातमजुरीचे काम करतात तर घरी आई, आजी आणि एक बहिण असा परीवार आहे. या दुदैवी घटनेमुळे परीसरात हळहळ व्यक्त केली जात आहे.
