जळगाव मिरर | १२ मे २०२६
जामनेर तालुक्यात जुन्या वादातून एका तरुणाला लाठ्या-काठ्यांनी बेदम मारहाण करण्यात आली. एवढेच नाही, तर कपडे काढून त्याला रस्त्यावर पळवल्याची धक्कादायक घटना घडली. यानंतर संशयितांनी तरुणाच्या घरावर पेट्रोल फेकून पेटवण्याचाही प्रयत्न केला. या प्रकरणी फत्तेपूर पोलिसात आठ संशयितांविरुद्ध गुन्हा दाखल करण्यात आला आहे. गोरनाळे (ता. जामनेर) येथे शुक्रवारी दुपारी ४ वाजेच्या सुमारास ही घटना घडली.
मिळालेल्या माहितीनुसार, गोरनाळे येथील रहिवासी योगेश भारत इंगळे याचा गावात काही जणांशी जुना वाद होता. शुक्रवारी तो शेतात जात असताना, गावातील सहा जणांनी त्याला घरासमोरच अडवले. काही समजण्याच्या आतच संशयितांनी त्याला लाठ्या-काठ्यांनी मारहाण करण्यास सुरुवात केली. संशयितांनी तरुणाच्या अंगावरील कपडे काढून त्याला विवस्त्र अवस्थेत रस्त्यावर पळवून लावले. पीडित तरुण जीव वाचवून घरी परतला असता, संशयितांनी त्याचा पाठलाग केला. संशयितांनी त्याच्या घराचा दरवाजा तोडून घरावर पेट्रोल फेकत पेटवून देण्याचा आणि जिवे मारण्याचा प्रयत्न केला.
घटनेची माहिती मिळताच फत्तेपूर पोलिसांनी तातडीने धाव घेतली. जखमी योगेश इंगळे याला पोलिस वाहनातून दवाखान्यात नेले जात असताना, रांजणी गावाजवळ रुग्णवाहिका उपलब्ध झाली. तिथून त्याला तातडीने जामनेर येथील उपजिल्हा रुग्णालयात दाखल करण्यात आले. घटना घडल्यापासून तो जामनेर येथील ग्रामीण रुग्णालयात दाखल होता. रविवारी त्याची सुटका झाल्याने त्याने फत्तेपूर पोलिसात फिर्याद दिली. योगेश इंगळे याने दिलेल्या तक्रारीवरून फत्तेपूर पोलिस ठाण्यात ८ संशयितांविरुद्ध विविध कलमान्वये गुन्हा दाखल करण्यात आला आहे.
