जळगाव मिरर | ३ डिसेंबर २०२३
देशातील अनेक राज्यात सरकारी अधिकाऱ्यामध्ये लाचखोरीचे प्रमाण मोठ्या प्रमाणात वाढले असून नुकतेच मध्य व पश्चिम रेल्वेच्या दोन वरिष्ठ अधिकाऱ्यांनी केलेल्या लाचखोरीच्या दोन स्वतंत्र प्रकरणांत या अधिकाऱ्यांसह सीबीआयने अन्य तीन जणांना अटक केली आहे. या दोन्ही प्रकरणांची कार्यपद्धती एकसारखीच आहे. या दोघांच्या अटकेनंतर – सीबीआयच्या अधिकाऱ्यांनी मुंबई, कोलकाता, नोएडा, जमशेदपूर, अहमदाबाद, बडोदा येथे एकूण १२ ठिकाणी छापेमारी केली आहे.
मिळालेल्या माहितीनुसार, यापैकी पहिल्या प्रकरणात मध्य – रेल्वेच्या उपमुख्य व्यवस्थापकपदावर काम करणाऱ्या एका अधिकाऱ्याला अटक करण्यात आली असून, तो भारतीय रेल्वे सेवेच्या २००० तुकडीचा अधिकारी आहे. नोएडा येथील एका कंपनीला कंत्राट देण्यासाठी त्याने लाचखोरी केल्याचा ठपका आहे. या प्रकरणी दोन मध्यस्थांनी काम केले होते. हे दोघेही गेल्या काही काळापासून रेल्वेच्या अनेक अधिकाऱ्यांना लाच देत असल्याची माहिती पुढे आली आहे. यापैकी दुसऱ्या प्रकरणात, पश्चिम रेल्वेच्या मुख्यालयात बसणाऱ्या उपमुख्य मटेरियल मॅनेजरला अटक करण्यात आली आहे.