जळगाव मिरर | १६ जून २०२६
चोपडा शहर पोलिसांनी गुप्त माहितीच्या आधारे कारवाई करत एका युवकाला गावठी कट्टा (पिस्तूल), मॅगझीन, दुचाकी आणि मोबाईलसह ताब्यात घेतले. ही कारवाई १३ जून रोजी रात्री साडेआठ वाजेच्या सुमारास मामलदे फाटा परिसरातील शनि मंदिराजवळ करण्यात आली. या कारवाईमुळे परिसरात खळबळ उडाली आहे.
पोलिसांना मिळालेल्या गुप्त माहितीनुसार, एक संशयित युवक दुचाकीवरून बेकायदेशीर शस्त्र घेऊन फिरत असल्याची माहिती मिळाली होती. त्यानुसार चोपडा शहर पोलिसांनी चुंचाळे रोड परिसरात सापळा रचला. दरम्यान, संशयास्पद हालचाल करणाऱ्या एका दुचाकीस्वाराला थांबवून त्याची चौकशी करण्यात आली.
चौकशीदरम्यान त्याने आपले नाव विनोद वसंतराव पावरा (वय २४, रा. अमळवाडी, ता. चोपडा) असे सांगितले. त्याची झडती घेतली असता त्याच्याकडून स्टील बनावटीचा गावठी कट्टा (पिस्तूल) आणि मॅगझीन आढळून आले. याशिवाय त्याच्या ताब्यातील काळ्या रंगाची होंडा लिवो दुचाकी (क्र. एमएच १९ सीएस ६१९८) आणि ओप्पो कंपनीचा मोबाईल फोन जप्त करण्यात आला.
या कारवाईत पोलिसांनी एकूण ८५ हजार रुपये किमतीचा मुद्देमाल हस्तगत केला. आरोपीकडे शस्त्र बाळगण्याचा कोणताही वैध परवाना नसल्याचे प्राथमिक चौकशीत समोर आले आहे. याप्रकरणी विनोद पावरा याच्याविरुद्ध बेकायदेशीररीत्या गावठी कट्टा बाळगल्याप्रकरणी शस्त्र कायद्यान्वये गुन्हा दाखल करण्याची प्रक्रिया सुरू असून पुढील तपास चोपडा शहर पोलिस करीत आहेत.
