जळगाव मिरर / ३० एप्रिल २०२३ ।
गेल्या तीन दिवसापासून जळगाव जिल्ह्यात वादळ वाऱ्यासह जोरदार अवकाळी पाऊस बरसत आहे. यात अनेक शेतकरीचे मोठे नुकसान देखील झाले आहे. तर शनिवारी संध्याकाळी झालेल्या वादळी पावसाने दोन जणांचा बळी घेतला.
मिळालेल्या माहितीनुसार, शहरातील शिवाजीनगर परिसरातील महावीर जिनिंगची भिंत कोसळून त्याखाली दबल्याने ज्ञानदेव मोतीराम पाटील (६०, रा. आसोदा) या सुरक्षारक्षकाचा मृत्यू झाला. दुसऱ्या घटनेत तालुक्यातील बोरनार येथे वादळी पावसात पत्रे उडाल्याने मार बसल्याने प्रभाकर जामा चौधरी (वय ७०) या वृद्धाचा मृत्यू झाला.
सुरक्षारक्षक ज्ञानदेव पाटील हे शिवाजीनगर परिसरातील मनपा आयुक्तांच्या निवासस्थानावर सुरक्षारक्षक होते. शनिवारी पाटील हे महावीर जिनिंगच्या संरक्षक भिंतीजवळून जात असताना जिनिंगची भिंत कोसळली. त्यात त्यांचा मृत्यू झाला. वादळी पावसाचा तडाखा बोरणार येथेही बसला. प्रभाकर चौधरी यांचे पत्रे या वादळी पावसामुळे उडाले. त्यामुळे त्यांना छातीला व पायाला गंभीर दुखापत झाली. जिल्हा रुग्णालयात आणत असताना त्यांचा मृत्यू झाला. त्यांच्या पश्चात पत्नी, तीन मुले व एक मुलगी असा परिवार आहे.
