जळगाव मिरर | १३ जून २०२६
भुसावळ शहरातील लकीबा नगर परिसरात एका अनोळखी तरुणाचा झाडाला गळफास घेतलेल्या अवस्थेतील मृतदेह आढळून आल्याने परिसरात खळबळ उडाली आहे. गुरुवारी (दि. ११) उघडकीस आलेल्या या घटनेमुळे आत्महत्येसह घातपाताचीही शक्यता व्यक्त केली जात असून बाजारपेठ पोलिसांनी तपासाची चक्रे वेगाने फिरविली आहेत.
मिळालेल्या माहितीनुसार, लकीबा नगर परिसरातील एका झाडाला हिरव्या रंगाच्या ओढणीच्या सहाय्याने तरुणाचा मृतदेह लटकलेल्या अवस्थेत आढळून आला. स्थानिक नागरिकांच्या निदर्शनास ही बाब आल्यानंतर तातडीने पोलिसांना माहिती देण्यात आली.
या घटनेतील सर्वात गूढ बाब म्हणजे ज्या ठिकाणी मृतदेह आढळला तेथे पोहोचण्यासाठी सुमारे २० ते २५ वर्षांपासून बंद असलेल्या घराच्या छतावरून जावे लागते. संबंधित घराचे मालक श्रीकांत पाठक असून ते सध्या पुणे येथे वास्तव्यास असल्याची माहिती समोर आली आहे. त्यामुळे संबंधित तरुणाने स्वतः गळफास घेतला की त्याचा मृतदेह तेथे आणून लटकविण्यात आला, याबाबत संशय निर्माण झाला आहे.
घटनेची माहिती मिळताच बाजारपेठ पोलीस ठाण्याचे अधिकारी व कर्मचारी घटनास्थळी दाखल झाले. त्यांनी मृतदेह खाली उतरवून पंचनामा केला. त्यानंतर शवविच्छेदनासाठी मृतदेह ग्रामीण रुग्णालयात पाठविण्यात आला. मृत तरुणाची ओळख अद्याप पटलेली नसून त्याचे वय अंदाजे २५ ते ३० वर्षे असल्याचे सांगितले जात आहे. पोलिसांकडून परिसरातील नागरिकांकडे चौकशी केली जात असून हरविलेल्या व्यक्तींच्या नोंदीही तपासल्या जात आहेत.
दरम्यान, आत्महत्या की घातपात याबाबत विविध शक्यतांच्या अनुषंगाने तपास सुरू असून शवविच्छेदन अहवालानंतर मृत्यूमागील नेमके कारण स्पष्ट होण्याची शक्यता आहे. मृताची ओळख पटविण्यासाठी पोलिसांकडून प्रयत्न सुरू आहेत.
