जळगाव मिरर | ८ डिसेंबर २०२५
नाशिक जिल्ह्यातील येवला तालुक्यातील कातरणी गावात रविवारी दुपारी एक हृदय पिळवटून टाकणारी घटना घडली. कांदा पिकावर ट्रॅक्टरचलित ब्लोअर मशिनद्वारे औषध फवारणी करत असताना केस मशिनमध्ये अडकून माधुरी दीपक सोनवणे (२७) या विवाहित महिलेला जीव गमवावा लागला. या घटनेने परिसरात हळहळ व्यक्त करण्यात येत असून दोन चिमुकल्या मुलींनी आईचे छत्र गमावले आहे.
माधुरी आणि दीपक सोनवणे हे अल्पभूधारक शेतकरी असून केवळ एक एकर शेतीवर कुटुंबाचा उदरनिर्वाह चालवत होते. बदलत्या हवामानामुळे कांदा पिकावर रोगराई वाढू लागल्याने दोघेही रविवारी शेतात औषध फवारणी करत होते. ट्रॅक्टरला जोडलेल्या शक्तिशाली ब्लोअर मशिनद्वारे फवारणी सुरू असताना, मशिनच्या टाकीतील द्रव संपल्याने माधुरी मशिनजवळ मिश्रण भरण्यासाठी गेल्या.
याचवेळी त्यांच्या लांब केसांचा मागचा भाग मशिनच्या फिरत्या पंख्यात अडकला आणि प्रचंड वेगाने फिरणाऱ्या ब्लोअरने त्यांना एका क्षणात आत ओढून घेतले. तीव्र धक्क्यामुळे त्यांच्या डोक्याला गंभीर दुखापत होऊन मोठा रक्तस्त्राव झाला. उपस्थितांनी तत्काळ त्यांना मनमाड येथे उपचारासाठी हलवले, मात्र स्थिती गंभीर असल्याने त्यांना पुढे येवला ग्रामीण रुग्णालयात नेण्यात आले. डॉक्टरांनी तपासणीअंती त्यांना मृत घोषित केले.
रात्री उशिरा कातरणी गावात शोकाकुल वातावरणात त्यांचे अंत्यसंस्कार पार पडले. येवला पोलिसांनी या घटनेची अकस्मात मृत्यू म्हणून नोंद केली आहे. माधुरी यांच्या पश्चात ३ वर्षांची मोठी मुलगी आणि दीड वर्षांची लहान मुलगी असा परिवार आहे. कुटुंबावर अचानक ओढवलेल्या या दुःखद प्रसंगामुळे संपूर्ण परिसरात शोककळा पसरली आहे.
