अमळनेर : प्रतिनिधी
कृषी उत्पन्न बाजार समितीची प्रारूप मतदार यादी आज जाहीर करण्यात आली. त्या बाजार समिती, पंचायत समिती, तहसील कार्यालय व सहाय्यक निबंधक कार्यालयात मतदार याद्या प्रसिद्ध करण्यात आल्या आहेत. त्यावर २३ नोव्हेंबर पर्यंत हरकत घेण्याची अंतिम मुदत आहे.
१४ नोव्हेंबर ते २३ नोव्हेंबर दरम्यान मतदार याद्यांवर हरकती मागवण्यात आल्या आहेत. २ डिसेंबर रोजी आक्षेप व हरकतीवर जिल्हा उपनिबंधक सुनावणी घेऊन निर्णय घेणार आहेत. अंतिम मतदार यादी ७ डिसेंबर रोजी प्रसिद्ध करण्यात येणार आहे. अमळनेर बाजार समितीत विविध कार्यकारी सोसायटी मतदार संघात १११६ मतदार आहेत. या मतदार संघातून एकूण ११ जागा निवडून द्यायच्या आहेत. त्यात सर्वसाधारण मतदार संघ ७ जागा, महिला राखीव २, इतर मागासवर्ग १,भटक्या विमुक्त १ अशा ११ जागा निवडण्यात येतील. ग्रामपंचायत मतदार संघातून फक्त ४ जागा निवडण्यात येतील. त्यात खुला प्रवर्ग २ जागा, अनुसूचित जाती जमाती १, आर्थिक दुर्बल १, तालुक्यात ११९ ग्रामपंचायती मध्ये ९९२ सभासदांचा मतदार म्हणून समावेश झाला आहे. व्यापारी मतदार संघातून २ जागा निवडण्यात येतील. या मतदार संघात ३०९ मतदार आहेत. तर हमाल मापाडी मतदार संघातून १ जागा निवडण्यात येईल त्यात ३४४ मतदार आहेत. बाजार समितीत एकूण १८ संचालक निवडण्यात येतील.
