जळगाव मिरर । १ जानेवारी २०२३
जळगावातून भडगाव येथे लहान विवाहित मुलीच्या भेटीसाठी निघालेल्या बापाला मुलीच्या डोळ्यासमोर भरधाव वेगाने जाणार्‍या ट्रकने चिरडल्याची दुर्दैवी घटना शनिवारी दुपारी 12.30 वाजेच्या सुमारास तालुक्यातील रामदेववाडी गावाजवळ घडली. या अपघातात मुक्ताईनगर तालुक्यातील चारठाणा येथील राजू दीपक कोळी (वय-45) असे मयताचे नाव असून त्यांची मोठी मुलगी गंभीर जखमी झाली असून तिच्यावर खासगी रुग्णालायात उपचार सुरु आहेत.
मुक्ताईनगर तालुक्यातील चारठाणा येथे राजू कोळी हे कुटुंबियांसह वास्तव्यास असून ते शेती काम करुन कुटुंबाचा उदनिर्वाह करीत होते. त्यांची लहान विवाहित मुलीला भेटण्याासाठी ते शनिवारी सकाळी मोठी मुलगी सोनी हिला सोबत घेवून भडगावला दुचाकीने जाण्यासाठी निघाले. रामदेववाडी गावाजवळून ते जात असतांना दुपारी साडेबारावाजेच्या सुमारास त्यांना मागून भरधाव वेगाने जाणार्‍या ट्रकने जोरदार धडक दिली. या अपघातात दुचाकीस्वार राजू कोळी व त्यांची मुलगी हे रस्त्यावर फेकले गेल्याने ट्रकचे चाक राजू कोळी यांच्या डोक्यावरुन गेल्याने त्यांचा जागीच मृत्यू झाला तर त्यांची मुलगी सोनी ही गंभीर जखमी झाली आहे. अपघात इतका विचित्र होता की, भरधाव वेगाने जाणारा ट्रक थेट राजू कोळींच्या डोक्यावरुन गेल्याने त्यांच्या डोक्यांचा भागाचा पुर्णपणे चेंदामेंदा झाला होता. मुलीच्या पायाला गंभीर दुखापत झाली आहे. आपल्या डोळ्यासमोरच वडीलांचा मृत्यू झाल्याने मुलीची जागेवरच शुद्ध हरपून गेली होती.
घटनेची माहिती मिळताच राजू कोळी यांच्या कुटुंबियांसह नातेवाईकांनी धाव घेतली. कुटुंबियांनी रुग्णालयात मनहेलावणारा आक्रोश केेला. सायंकाळी एमआयडीसी पोलिसांकडून पंचनामा करून शवविच्छेदनानंतर मृतदेह कुटूंबियांच्या ताब्यात देण्यात आला. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे. अपघाताची माहिती मिळताच ग्रामस्थांनी घटनास्थळी धाव घेतली होती. एमआयडीसी पोलिस ठाण्यातील पोलिस कर्मचारी स्वप्निल पाटील, हेमंत पाटील यांनी घटनास्थळी धाव घेवून ग्रामस्थांच्या मदतीने मृतदेह शववाहिकेतून जिल्हा रूग्णालयात पाठविले तर जखमी मुलीला खासगी रूग्णालयात हलविले. तिची प्रकृती स्थिर असल्याची माहिती नातेवाईकांनी दिली आहे.
