जळगाव मिरर / ४ जानेवारी २०२३
महिन्याभरापासून पुणे जिल्ह्यातील गुन्हेगारी मोठ्या प्रमाणात वाढत आहे. यातच अशा भयंकर घटना समोर येत आहेत त्यामध्ये अल्पवयीन मुले गुन्हेगारीच्या विश्वात पाय रोवताना दिसत आहे तर पुणे पोलीस हि अशा घटनेमधील संशयित आरोपीना ताब्यात लागलीच घेत असल्याने गुन्हा का झाला व कसा झाला याचा लागलीच तपास लागत आहे. अशीच एक धक्कादायक घटना पुण्यात घडली आहे.
कोंढवा भागातील मेफेअर एलिगंझा सोसायटीजवळ मोकळ्या जागेत एका महिलेचा मृतदेह आढळून आला होता. महिलेच्या डोक्यात दगड घालून तिचा खून करण्यात आल्याचे प्राथमिक तपासातून समोर आले होते. यानंतर आता या निर्घृण खूनाचा उलघडा करण्यात पुणे पोलिसांना यश आले आहे. पुणे गुन्हे शाखा आणि कोंढवा पोलिसांनी या प्रकरणी एका तरुणाला अटक केली असून आणखी एका अल्पवयीन मुलाला ताब्यात घेतले आहे.
खून झालेल्या महिलेने दारू मागितल्याने आरोपींनी तिच्या डोक्यात दगड घातला आणि तिची हत्या केली. पोलीस तपासातून ही माहिती समोर आली आहे. पोलिसांनी याप्रकरणी जैद आसिफ शेख याला अटक केली आहे. मात्र अद्याप मृत महिलेची ओळख पटलेली नाही. या हत्येनंतरही हे दोन्ही आरोपी हत्या केलेल्या ठिकाणी दारु प्यायला बसले होते. याची माहिती मिळताच गुन्हे शाखा युनिट पाच आणि कोंढवा पोलिसांनी या आरोपींना ताब्यात घेतले आहे. 1 जानेवारी रोजी दोन्ही आरोपी या सोसाटीच्या जवळ दारु प्यायला बसले होते. त्याचवेळी तिथे ही महिला आली. महिलेने दोघांकडे दारु मागितली. मात्र त्यानंतर तिने आरोपींसोबत वाद घालण्यास सुरुवात केली. यावेळी रागाच्या भरात जैद आणि त्याच्या साथीदाराने महिलेच्या डोक्यात दगड घातला. यातच महिलेचा मृत्यू झाल्याचे समोर आले आहे.
दरम्यान, याप्रकरणी गुन्हे शाखेचे अतिरिक्त पोलीस आयुक्त रामनाथ पोकळे, उपायुक्त अमोल झेंडे, रंजन शर्मा, सहायक आयुक्त विक्रांत देशमुख, पौर्णिमा तावरे, नारायण शिरगावकर यांच्या मार्गदर्शनाखाली पोलीस निरीक्षक उल्हास कदम, पोलीस निरीक्षक संजय मोगले आणि पथकाने आरोपींना ताब्यात घेतले आहे.
