जळगाव मिरर | २३ जून २०२३
शहरात गेल्या काही महिन्यापासून अनेक घरफोडी तर चोरीच्या घटनेत सातत्याने वाढ होत असतांना दिसत आहे. नुकतेच शहरातील दौलत नगर भागातील बंद घरातून चोरट्यांनी ९० हजारांचा ऐवज लांबवला. हा प्रकार गुरुवारी सकाळी उघडकीस आला. या प्रकरणी गुरुवारी दुपारी 2दोन वाजता अज्ञात चोरट्यांविरुध्द रामानंदनगर पोलीस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, शहरातील दौलतनगरात संतोष भाऊलाल नेटके हे आपल्या परीवारासह वास्तव्याला आहेत. नेटके हे जळगाव तालुक्यातील पाथरीचे आहेत मात्र मुलांच्या शिक्षणासाठी ते जळगावात राहतात. मंगळवारी ते आपली पत्नी सोनी नेटके व मुलगी भूमिका यांच्यासह पाथरी येथे गेले असता घर बंद असल्याची संधी चोरट्यांनी साधली. बुधवारी रात्री घर फोडून घरातून 47 हजार 500 रुपयांची रोकड, पाच ग्रॅम व 4 ग्रॅम वजनाच्या 40 हजार किंमतीच्या दोन सोन्याच्या अंगठ्या व एक तीन हजार रुपये किंमतीचा मोबाईल चोरट्यांनी लांबविला आहे. गुरुवार, 22 जून सकाळी नळ आल्यानंतर नेटके यांच्या घरातून मोठ्या प्रमाणात पाणी वाहत असल्याने शेजारील रहिवाशी विजय नथ्थु कोल्हे यांनी पाहिले असता चोरीचा प्रकार लक्षात आला.. कोल्हे यांनी नेटके यांना याबाबतची माहिती दिली. नेटके यांनी घरी येवून याबाबतची माहिती पोलिसांना दिली. रामानंदनगर पोलीस ठाण्याचे संजय सपकाळे व सुशील चौधरी या दोघांनी घटनास्थळी भेट दिली. त्यानंतर संतोष नेटके यांच्या फिर्यादीवरून अज्ञात चोरट्यांविरुध्द गुन्हा दाखल करण्यात आला.
