जळगाव मिरर | १६ जुलै २०२३
राज्यातील शिंदे व फडणवीस सरकारमध्ये गेल्या काही दिवसाआधी राष्ट्रवादी काँग्रेसचे नेते अजित पवार यांनी उपमुख्यमंत्री पदाची शपथ घेत सत्तेत सामील होण्याचा निर्णय घेतल्यानंतर राष्ट्रवादी काँग्रेस पक्षात उभी फूट पडल्याचे पाहायला मिळाले होते. यानंतर आज अजित पवार गटातील सर्वच नेते अचानक शरद पवार यांच्या भेटील पोहचले. दरम्यान राष्ट्रवादीचे नेते प्रफुल्ल पटेल यांनी आज शरद पवारांची भेट घेण्यामागची भूमिका माध्यमांसमोर स्पष्ट केली.
अजित पवार गटातील राष्ट्रवादीचे नेते प्रफुल्ल पटेल म्हणाले की, आज आमचे दैवत शरद पवार यांचे आशिर्वाद घेण्यासाठी अजित पवार, धनंजय मुंडे, छगन भुजबळ, दिलीप वळसे-पाटील, हसन मुश्रीफ, सुनिल तटकरे यांच्यासह हे सर्व नेते वाय बी चव्हाण सेंटरला वेळ न मागता संधी साधून आलो.
आम्ही शरद पवारांच्या पाया पडून आम्ही त्यांचे आशिर्वाद मागितले आणि त्यांना विनंती देखील केली, आमच्या मनात त्यांच्याबद्दल आदर आहेच, तसेच राष्ट्रवादी पक्ष एकसंध कसा राहू शकतो याबद्दल त्यांनी योग्य विचार करावा आणि मार्गदर्शन करावे असी विनंती देखील केली. यावर शरद पवारांनी कुठलीही प्रतिक्रिया दिली नाही, त्यांनी शांतपणे सगळं ऐकून घेतलं असेही प्रफुल्ल पटेल म्हणाले. उद्यापासून राज्याच्या विधानसभेचं अधिवेशन देखील सुरू होत आहे. सर्व मंत्री आपआपल्या मंत्रालयाची जबाबदारी विधानसभेत सुद्धा पार पाडतील असेही प्रफुल्ल पटेल यावेळी म्हणाले. दरम्यान राष्ट्रवादी पक्षातील बंडानंतर अजित पवार आणि त्यांचे समर्थक आमदार अचानक शरद पवारांच्या भेटीला पोहचल्याने राजकीय वर्तुळात चर्चांना उधाण आले आहे.
