जळगाव मिरर | संदीप महाले
अमळनेर सार्वजनिक बांधकाम विभागातील कथित आर्थिक गैरव्यवहार प्रकरणाची महिन्याभरात सखोल चौकशी करून दोषींवर कठोर कारवाई करण्यात येईल, अशी स्पष्ट ग्वाही सार्वजनिक बांधकाम मंत्री शिवेंद्रसिंहराजे भोसले यांनी गुरुवारी विधानसभेत दिली. विधानसभा सदस्य अनिल पाटील यांनी उपस्थित केलेल्या लक्षवेधी सूचनेला उत्तर देताना त्यांनी ही घोषणा केली. या चर्चेत सदस्य बालाजी काळे, हरिश पिंपळे आणि भीमराव तापकीर यांनीही सहभाग घेतला.
मंत्री भोसले यांनी सांगितले की, अमळनेर येथील कार्यकारी अभियंत्याविरोधात प्राप्त झालेल्या तक्रारींच्या पार्श्वभूमीवर यापूर्वी मुख्य अभियंत्यांना चौकशीचे निर्देश देण्यात आले होते. मात्र, प्रकरणाचे गांभीर्य लक्षात घेऊन आता मुख्य कार्यकारी अभियंत्यांच्या अध्यक्षतेखाली विशेष चौकशी समिती स्थापन करण्यात येणार असून ही समिती महिनाभरात अहवाल सादर करेल.
चौकशी निष्पक्ष आणि पारदर्शक व्हावी यासाठी संबंधित कार्यकारी अभियंत्याला सक्तीच्या रजेवर पाठविण्यात येणार असल्याचेही त्यांनी स्पष्ट केले. चौकशीत दोषी आढळणाऱ्या अधिकारी किंवा कर्मचाऱ्यांविरुद्ध कठोर प्रशासकीय कारवाई केली जाईल, असा इशाराही त्यांनी दिला. याशिवाय विभागातील सर्व आर्थिक व्यवहारांची सखोल तपासणी करण्यात येणार असून, आवश्यकतेनुसार आर्थिक गुन्हे शाखेकडे तक्रार दाखल केली जाईल. संपूर्ण प्रकरणाचे विशेष लेखापरीक्षण (स्पेशल ऑडिट) करून गैरव्यवहाराची व्याप्तीही तपासण्यात येणार असल्याचे मंत्री भोसले यांनी सभागृहात सांगितले. विधानसभेत झालेल्या या घोषणेमुळे अमळनेर सार्वजनिक बांधकाम विभागातील कथित गैरव्यवहार प्रकरणाला आता वेग आला असून, चौकशी अहवालानंतर संबंधितांवर कोणती कारवाई होते याकडे सर्वांचे लक्ष लागले आहे.
