थेट सोन्याच्या दुकानात होत होती देशी दारू विक्री !

जळगाव मिरर | २८ ऑगस्ट २०२३

राज्यातील दारू विक्री करण्यातही कोण कोणती युक्ती लढवेल हे कुणीही सांगू शकत नाही अशीच एक घटन राज्यातील जालना जिल्ह्यात घडली आहे. परतूर तालुक्यातील संकनपुरी येथील साईकृपा ज्वेलर्समध्ये सुरू असलेल्या दारू विक्रीच्या अड्ड्यावर छापा टाकून पोलिसांनी मुद्देमाल जप्त केला आहे. चक्क सोन्याच्या दुकानात देशी दारूची विक्री केली जात असल्याने आश्चर्य व्यक्त केले जात आहे.

मुकुंद किसनराव शहाणे हे त्यांच्या साईकृपा ज्वेलर्समध्ये देशी दारूची विक्री करीत असल्याची माहिती आष्टी पोलिसांना मिळाली. या माहितीवरून शनिवारी सायंकाळी पोलिसांच्या पथकाने छापा टाकला. यावेळी ६ हजार ६०० रुपये किमतीच्या देशी दारूच्या ६६ बाटल्या जप्त करण्यात आल्या. याप्रकरणी पोकॉ भरत ढाकणे यांनी दिलेल्या तक्रारीवरून गुन्हा दाखल करण्यात आला आहे.