जळगाव मिरर | १७ फेब्रुवारी २०२४
माहितीच्या अधिकारात मागितलेली माहिती न दिल्याने शासकीय वैद्यकीय महाविद्यालय व रुग्णालयाचे वैद्यकीय अधीक्षक डॉ. विजय गायकवाड यांना मोबाईलवरून शिवीगाळ केली. तसेच रुग्णालयाची तोडफोड करून मारहाण करण्याची धमकी दिल्याची घटना उघडकीस आली. याप्रकरणी जिल्हापेठ पोलिस ठाण्यात अदखलपात्र गुन्ह्याची नोंद करण्यात आली आहे.
मिळालेल्या माहितीनुसार, जिल्हा शासकीय वैद्यकीय महाविद्यालय व रुग्णालयाचे वैद्यकीय अधीक्षक डॉ. विजय गायकवाड यांना महेंद्र पाटील याने माहिती अधिकारात काही माहिती मागितली होती. डॉ. गायकवाड यांनी ती माहिती न दिल्याचा राग आल्याने महेद्र पाटील याने गुरुवार दि. १५ फेब्रुवारी रोजी डॉ. गायकवाड यांच्या मोबाईलवर संपर्क साधला. तसेच त्यांना शिवीगाळ देखील केली. तसेच रुग्णालयाची तोडफोड करून डॉक्टरांना मारहाण करेल, अशी धमकीही दिली. या प्रकरणी डॉ. गायकवाड यांनी जिल्हापेठ पोलिस ठाण्यात फिर्याद दिली. त्यावरून शुक्रवार दि. १६ फेब्रुवारी रोजी अदखलपात्र गुन्ह्याची नोंद करण्यात आली आहे.
