जळगाव मिरर | ३ मार्च २०२४
जळगाव शहरातील शाहूनगर परिसरातील मजीद चांद शेख (वय ४४, रा. इंदिरानगर, शाहूनगर) याच्या राहत्या घरात विक्रीसाठी साठवून ठेवलेला ३२४ ग्रॅम वजनाचा ८ हजार १०० रुपये किमतीचा गांजा शहर पोलिसांनी जप्त केला. ही कारवाई शुक्रवार दि. १ मार्च रोजी करण्यात आली. त्याच्याविरुद्ध शहर पोलिस ठाण्यात गुन्हा दाखल करण्यात येऊन त्याला अटक करण्यात आले आहे.
मिळालेल्या माहितीनुसार, शहरातील शाहूनगर परिसरातील मजीद शेख हे वास्तव्यास असून त्याने घरात विक्रीसाठी गांजा ठेवला असल्याची माहिती शहर पोलिस ठाण्याचे पोलिस निरीक्षक अनिल भवारी यांना मिळाली. त्यांनी कारवाईच्या सूचना दिल्या. त्यानुसार कर्मचाऱ्यांनी शाहूनगरात शेख याच्या घरी जाऊन पाहणी केली असता तेथे ८ हजार १०० रुपये किमतीचा ३२४ ग्रॅम वजनाचा अर्धवट ओला गांजा व बिया आढळून आल्या. या गांजासह वजनकाटा व इतर साहित्य असे एकूण आठ हजार ६२० रुपये किमतीचा मुद्देमाल जप्त करण्यात आला. या प्रकरणी पोहेकॉ विजय निकुंभ यांनी शहर पोलिस ठाण्यात फिर्याद दिली. त्यावरून मजीद चांद शेख याच्याविरुद्ध गुन्हा दाखल करण्यात येऊन त्याला अटक करण्यात आले आहे. पुढील तपास सपोनि रवींद्र बागूल करीत आहेत
