जळगाव मिरर | २२ जुलै २०२४
पुण्यातील भाजप प्रदेश कार्यकारिणीच्या बैठकीत अमित शहा यांनी महाविकास आघाडीवर जोरदार हल्लाबोल केला केला होता. भारताच्या राजकारणातील भ्रष्टाचाराचे म्होरके कोण असतील तर ते शरद पवार आहेत. भ्रष्टाचाराला संस्थात्मक रुप देण्याचे काम हे शरद पवारांनी केले, असे ते म्हणाले होते. त्यांच्या या टीकेला राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी सडेतोड प्रत्युत्तर दिले आहे.
खा.सुळे म्हणाले कि, शरद पवार भ्रष्टाचाराचे म्होरके असतील, तर मोदी सरकारनेच त्यांचा पद्मविभूषण पुरस्काराने गौरव केला. त्यामुळे शरद पवार नक्की काय आहेत हे भाजपने ठरवावे, असा टोला त्यांनी अमित शहा यांना हाणला आहे. आज भाजपचे लोक ज्याला एनडीए सरकार म्हणतात, ते काही महिन्यांपूर्वी मोदी सरकार होते. याच मोदी सरकारने शरद पवार यांना पद्मविभूषण देऊन त्यांचा गौरव केला होता. त्यामुळे शरद पवार नक्की काय आहेत हे भाजपने ठरवावे. स्वतः अमित शहा त्याच सरकारमध्ये मंत्री होते. पण त्यांना याचा विसर पडल्यामुळे त्यांनी ही टीका केली असावी, असे सुप्रिया सुळे म्हणाल्या.
भाजपने महाराष्ट्रातील ज्या नेत्यांवर भ्रष्टाचाराचे आरोप केले, ते नेते आज महायुती सरकारमध्ये मंत्री आहेत. अमित शहा यांच्या कार्यक्रमात ज्या व्यक्तीवर सर्वात जास्त भ्रष्टाचाराचे आरोप होते, ते अशोक चव्हाण आज त्यांच्याच मागे बसले होते. महाराष्ट्रच नव्हे तर काश्मीर ते कन्याकुमारपर्यंत ज्या नेत्यांवर त्यांनी भ्रष्टाचाराचे आरोप केले, त्यापैकी 90 टक्के लोक आज भाजपमध्ये आहेत. याला भाजपची वॉशिंग मशीन कारणीभूत आहे, असा टोलाही सुप्रिया सुळे यांनी भाजपवर शरसंधान साधताना हाणला.