जळगाव मिरर | १२ जून २०२५
उपचार करण्यासाठी घेऊन जाते असे सांगत ज्योतीबाई भगवान बाविस्कर (वय ४७, रा. संत गाडगेबाबा बेघर निवारा केंद्र) या महिलेचे दागिने व मोबाईल घेऊन एक महिला पसार झाली. ही घटना दि. ७ जून रोजी चिमुकले राम मंदिर परिसरात घडली. याप्रकरणी जिल्हापेठ पोलिस ठाण्यात अज्ञात महिलेविरुद्ध गुन्हा दाखल करण्यात आला आहे.
सविस्तर वृत्त असे कि, शहरातील भजे गल्लीत असलेल्या संत गाडगेबाबा बेघर निवारा केंद्रामध्ये ज्योतीबाई बाविस्कर यांचे पती २५ वर्षांपूर्वी त्यांना सोडून गेलेले आहे. तर त्यांची मुलगी शिरपूर येथे सासरी राहते. ही महिला दररोज सकाळी चिमुकले राम मंदिरात स्वइच्छेने साफसफाई करण्यासाठी जाते. दि. ५ जून रोजी मंदिराजवळ या महिलेला एक अनोळखी महिला भेटली. तीने बाविस्कर यांना मी तुम्हाला साडी देईल तुम्हाला चालेल का? असे विचारले. त्यावर ज्योतीबाईने हो सांगितले. दि. ७ जून रोजी अज्ञात महिला पुन्हा या महिलेस भेटली व तिची विचारपूस करून साडी देत तिचा विशवास संपादन केला. मी तुम्हाला उपचारासाठी घेऊन जाते असे सांगून साकेगाव शिवारातील येथील खासगी रुग्णालयात घेऊन गेली. तेथे एक्स-रे काढायचा असल्याचे सांगून ज्योतीबाईला तिचे दागिने काढण्यास सांगितले. स्वतःजवळ पिशवी अथवा काहीच नसल्याने अज्ञात महिलेजवळच दागिने व मोबाईल ठेवण्यासाठी दिले.
फसवणुक करणारी महिला ज्योतीबाईला नाश्ता करायचा म्हणून भुसावळ येथे घेऊन गेली. त्याठिकाणी दोघींनी साबुदाणा खाल्यानंतर अज्ञात महिला ज्यूस घेऊन येते, असे सांगून गेली. बराच वेळ वाट पाहूनही ती न आल्याने ज्योतीबाई भुसावळ येथे पोलिस ठाण्यात गेल्या असता. त्यांना नशिराबाद पोलिस ठाण्यात जाण्याविषयी सल्ला देऊन त्यांना रिक्षात बसवून देण्यात आले.
भुसावळ पोलिसांनी रिक्षात बसविल्यानंतर काहीच समजत नसल्याने ही महिला नशिराबादला न उरतता थेट जळगावला आली. येथे बेघर निवारा केंद्रात त्यांनी ही हकीकत सांगितली. त्यानंतर त्यांना बेघर निवारा केंद्रातील सदस्यांनी पोलीसात तक्रार करण्याचा सल्ला दिला. दागिने घेऊन गेलेली महिला परत येईल, या आशेवर होत्या. मात्र प्रतीक्षा करूनही ती न आल्याने ज्योतीबाईने जिल्हापेठ पोलिस ठाण्यात फिर्याद दिली. त्यावरून अज्ञात महिलेविरुद्ध फसवणुकीचा गुन्हा दाखल करण्यात आला आहे. पुढील तपास पोहेकों वंदना चव्हाण करीत आहेत.
