जळगाव मिरर | १४ जून २०२५
गुजरात राज्यातील अहमदाबाद येथील विमानाला झालेल्या अपघातात वरिष्ठ क्रू मेंबर श्रद्धा धवन यांचा मृत्यू झाला. श्रद्धा या मुलुंडमधील रहिवासी होत्या. विमान उड्डाणाआधी त्यांनी घरच्यांना कॉल करून ‘मी लवकरच येईन’, असे सांगितले होते. त्यांचा हा कॉल शेवटचा ठरला. त्यांचे पती एअर इंडियाचे कर्मचारी असून श्रद्धा यांची मुलगी दहावीत आहे.
मिळालेल्या माहितीनुसार, मुलुंड पश्चिमेला कल्पनगरीमधील निशाद सोसायटीत धवन कुटुंब राहते. गुरुवारी त्या नेहमीप्रमाणे कर्तव्यावर रुजू झाल्या. कुटुंबीयांना त्यांनी लवकरच येईन, असे दूरध्वनीवरून सांगितले. त्यानंतर विमान अपघाताची बातमी आली. श्रद्धा यांच्या पश्चात सासू, सासरे, पती राजेश आणि 15 वर्षीय मुलगी आहे. मुलगी दहावीत असून नवी मुंबईतील शाळेत शिकते. सध्या तिची परीक्षा सुरू असल्याची माहिती नातेवाईक आणि सोसायटी सदस्यांनी दिली. अहमदाबाद येथे घटना घडली त्यावेळी श्रद्धा यांचे पती दिल्लीला होते. या घटनेनंतर ते त्वरित मुलुंडला परतले. श्रद्धा यांच्या मृत्यूमुळे त्यांच्या कुटुंबाला जबर धक्का बसला आहे. तर सोसायटीतील सदस्यही या घटनेमुळे व्यथित झाले आहेत.
श्रद्धा यांची चुलत बहीण सृष्टी यांनी सांगितले की, श्रद्धा जेव्हा कामावर जात असत तेव्हा नेहमी घरच्यांशी संपर्कात असत. निशाद सोसायटीचे सचिव चंचल दास यांनी सांगितले की, श्रद्धा या स्वभावाने खूप मनमिळाऊ होत्या. श्रद्धा यांचा भाऊ अमेरिकेत राहतो. श्रद्धा यांच्या अपघाताची बातमी समजताच भाऊ अहमदाबादला रवाना झाला. डीएनए चाचणीनंतर पार्थिव कुटुंबाला सोपवले जाणार आहे. श्रद्धा गेल्या 20 वर्षांपासून एअर इंडियात नोकरीला होत्या.
