जळगाव मिरर | १९ जून २०२५
क्रेनद्वारे रेल्वेची बोगी उचलत असतांना अचानक क्रेनचा हुक तुटून खाली उभ्या असलेल्या कामगाराच्या डोक्यात पडला. यामध्ये कैलास रमेश माळी (वय २७, मूळ रा. पाळधी, ता. धरणगाव, ह. मु. वंजारी खपाट) या तरुणाचा दुर्देवी मृत्यू झाला. ही घटना बुधवारी सकाळी रेल्वे स्थानकाजवळ असलेल्या पार्सल कार्यालयाजवळ घडली याप्रकरणी लोहमार्ग पोलिसात अकस्मात मृत्यूची नोंद करण्यात आली आहे.
सविस्तर वृत्त असे कि, पाळधी येथील कैलास माळी याच्या आईवडीलांचे निधन झाल्यामुळे तो भावासह काका गिरधर माळी यांच्याकडे राहत होता. क्रेनवर काम करुन तो स्वतःचा उदनिर्वाह करीत होता. रेल्वे स्थानक परिसरात कामे सुरु असल्याने बुधवारी सकाळी पार्सल कार्यालयाजवळ असलेली रेल्वेची एक जूनी बोगी उचलून ती बाजूला ठेवण्याचे काम सुरु होते. त्या बोगीमध्ये कॅण्टीन सुरु करण्याचे नियोजन असल्यामुळे त्याठिकाणी तीन ते चार क्रेन मागविण्यात आल्या होत्या. क्रेनला साखळदंडासह क्रेनच्या पट्टच्या सहाय्याने क्रेनला बांधून बोगी उचलण्याच्या कामाला सुरुवात झाली. मात्र का ही वेळातच एका क्रेनचा हूक तुटून तो खाली उभ्या असलेल्या कैलासच्या डोक्यावर आणि नंतर मांडीवर पडल्याने त्याचा जागीच दुर्देवी मृत्यू झाला. हूक पडून तरुण कामगार जखमी झाल्याचे कळताच तेथील कामगारांसह लोहमार्ग पोलिस ठाण्याचे पोउनि राजेंद्र पाटील व त्यांचे सहकाऱ्यांनी त्याला रुग्णालयात दाखल केले. याठिकाणी डॉक्टरांनी तपासणी करीत कैलास माळी याला मयत घोषित केले. कामगारांनी व नातेवाईकांनी रुग्णालयात धाव घेतली होती.
कामाच्या ठिकाणी कामगारांच्या सुरक्षतेची साधने नसल्यामुळे अनेकांना आपला जीव गमवावा लागला आहे. शहरातील औद्योगीक वसाहतीसह बांधकामाच्या ठिकाणी अशा अनेक घटना घडल्या आहेत, अशा घटनांमध्ये अनेकांना घरातील कर्ता व्यक्ती गमवावा लागल्यामुळे अनेक कुटुंब उघड्यावर आली आहेत. दरम्यान, रेल्वेची बोगी उचलतांना क्रेनचा हूक तुटून तो कामगाराच्या डोक्यात पडून त्याचा मृत्यू झाल्याने कामगारांच्या सुरक्षीतेचा प्रश्न पुन्हा ऐरणीवर आला आहे. कैलास हा दीड महिन्यांपूर्वीच क्रेनवर कामाला लागला होता. सुरुवातीपासून तो मिळेल ते काम करून उदरनिर्वाह करायचा. दुर्देवी काळाने त्याच्यावर झडप घातली. होतकरू व कष्टाळू कैलासच्या जाण्याने पाळधी गावात शोककळा पसरली होती.
