जळगाव मिरर | २४ जुलै २०२५
अमळनेर तालुक्याच्या जानवे जंगलाच्या हद्दीत कवटी हाडे आणि अडीच महिन्यांपूर्वी सुरत येथील हरवलेल्या महिलेचे आधार कार्ड आढळून आले आहे.
सविस्तर वृत्त असे कि, जानवे जंगलात बकऱ्या चारणाऱ्या गुरख्यांना एक कवटी, काही हाडे, तसेच वैजंताबेन भगवान भोई (वय ५०) या सूरतच्या कुबेरनगर, कतार गाम दरवाजा या भागात राहणाऱ्या महिलेचे आधार कार्ड आढळून आले. त्यांनी अमळनेर पोलीस स्टेशनचे पो.नि. दत्तात्रय निकम यांना ही कळवली. त्यानंतर पो.नि. निकम यांनी हेडकॉन्स्टेबल कैलास शिंदे यांच्यासह घटनास्थळी धाव घेतली. तर जिल्हा पोलीस अधीक्षक डॉ. महेश्वर रेड्डी यांच्या परवानगीने फॉरेन्सिक पथकाला बोलावून घेतले. घटनस्थळवरून हाडे, केस, काही वस्तू तसेच काही नमुने ताब्यात घेऊन त्यांची तपासणी करण्यात येणार आहे.
घटनास्थळी अप्पर पोलीस अधीक्षक कविता नेरकर, डीवायएसपी विनायक कोते, पोलीस उपनिरीक्षक भगवान शिरसाठ, पोलीस उपनिरीक्षक नामदेव बोरकर, पोलीस उपनिरीक्षक समाधान गायकवाड, काशिनाथ पाटील, अमोल पाटील, जितेंद्र निकुंभे, सागर साळुंखे आदींनीही भेट देऊन पंचनामा केला. तसेच आजूबाजूचे नमुने घेतले आहेत.
