जळगाव मिरर | २४ जुलै २०२५
जळगाव शहर महापालिकेच्या दवाखाना विभागातील डॉ. विजय घोलप यांनी एका महिलेशी असभ्य वर्तन केल्याची तक्रार महिलेने आयुक्तांकडे केली होती. या प्रकरणात आयुक्तांनी स्वतःहून कारवाई केली पाहिजे होती मात्र, आयुक्तांनी डॉ. घोलप यांना पाठिशी घातल्याचे दिसून येत आहे. म्हणून या प्रकरणाची चौकशी पोलिसांकडे दिली पाहिजे व चौकशी होईपर्यंत डॉ. घोलप यांना पदावरून दूर केलं पाहिजे, कारण घोलप पदावर राहिल्यास सर्व प्रकरण दडपू शकतो, असे आ. एकनाथ खडसे यांनी पत्रकारांशी बोलतांना सांगितले.
महानगरपालिकेचे प्रमुख वैद्यकीय अधिकारी डॉ. विजय घोलप यांनी त्यांच्याच विभागातील एका महिला सहकाऱ्याशी असभ्य वर्तन केले असून लैंगिक जवळीक साधण्याच्या उद्देशाने प्रयत्न केला आहे. त्यामुळे संबधित महिलेने मनपा आयुक्त ज्ञानेश्वर ढेरे यांच्याकडे तक्रार केली असता आयुक्तांनी सदर तक्रार महिला तक्रार निवरण (विशाखा) समितीकडे सोपवली आहे. या तक्रार निवारण समितीच्या दोन बैठका झाल्या परंतु समितीकडून किंवा आयुक्तांकडून महिलेला न्याय मिळेल, असे दिसून येत नाही, कारण समितीच्या काही सदस्यांकडून तक्रार मागे घेण्यासाठी महिलेवर दबाव आणला जात असल्याचे महिलेने आयुक्तांना दिलेल्या अर्जात नमुद केले आहे. तसेच अशा पध्दतीने दबाव आणण्याचे कृत्य हे निंदणीय आहे, असेही महिलेने अर्जात म्हटले आहे. त्यावरून आ. एकनाथ खडसे यांनी सदर प्रकरणाचा तपास पोलिसांकडे सोपविण्यात यावा व डॉ. घोलप यांना दवाखाना विभागाच्या प्रमुख वैद्यकीय अधिकारी पदावरून दूर करण्यात यावे, अशी मागणी केली आहे.
महिलेने विशाखा समितीकडे तक्रार केली असता समितीने मिटींग घेतली. या मिटींग नंतर डॉ. घोलप यांचा खुलासा मागविण्यात आला होता. एकी कडे डॉ. घोलप यांनी संबंधित महिलेला तक्रार मागे घेण्यासाठी ५०० रुपयांच्या स्टॅम्प पेपरवर दि. १५ जुलै रोजी गुन्ह्याची कबुली देत नोटरी करून दिली आहे. ही नोटरी करून देतांना वकिलांसह चार साक्षीदार उपस्थित होते. तर, दुसरीकडे डॉ. घोलप यांनी असा काहीच प्रकार झालेला नाही, असा खुलासा समितीला सादर केला आहे. त्यामुळे डॉ. घोलप यांनी समितीची दिशाभूल करण्याचा प्रयत्न केला असल्याचे समोर आले आहे. त्यानंतर मंगळवारी समितीने या विषयावर मिटींग घेतली परंतु त्या मिटींगमध्ये तक्रारीबाबत गांभिर्याने घेण्यात आले नसल्याचे समोर आले आहे. त्यामुळे समितीच्या कामकाजावर प्रश्नचिन्ह उपस्थित होत आहे.
