जळगाव मिरर । २४ नोव्हेंबर २०२५
जळगाव शहरातील एमआयडीसी परिसरातील अयोध्या नगर भागात महिलेच्या गळ्यातील सोनसाखळी हिसकावून पळणाऱ्या दुचाकीस्वारांच्या टोळीचा अखेर पर्दाफाश करण्यात एमआयडीसी पोलिसांना यश मिळाले आहे. काही दिवसांपूर्वी घडलेल्या या चेन-स्नॅचिंग प्रकरणाने परिसरात भितीचे वातावरण निर्माण झाले होते. गुप्त माहितीच्या आधारे पोलिसांनी रचलेल्या सापळ्यातून दोन्ही आरोपींचा शोध घेत त्यांना जेरबंद केले असून चोरीस गेलेला सोन्याचा मुद्देमालही हस्तगत करण्यात आला आहे.
दि. १६ नोव्हेंबर रोजी अयोध्या नगरातील महिला आपल्या घरी दुचाकीने येत असताना दोन अज्ञात दुचाकीस्वारांनी तिच्या गळ्यातील सोनसाखळी जबरदस्तीने खेचून पोबारा केला. याप्रकरणी एमआयडीसी पोलीस स्टेशनमध्ये गुन्हा क्र. ८४९/२०२५ भा.दं.वि. २०२३ कलम ३०९(४), ३(५) प्रमाणे गुन्हा दाखल करण्यात आला होता.
घटनेनंतर पोलिसांनी गुप्त बातमीदारांच्या मदतीने माहिती गोळा केली व आरोपींची ओळख पटवली. १८ नोव्हेंबर रोजी माऊली नगर भागात रचलेल्या सापळ्यातून पोलिसांनी एक संशयिताला ताब्यात घेतले. चौकशीदरम्यान त्याने आपले नाव तेजस अनिल ईखनकर (रा. ज्ञानदेव नगर, जळगाव) असे सांगत गुन्ह्याची कबुली दिली. त्याचा साथीदार प्रसाद उर्फ परेश संजय महाजन याचाही या चोरीत सहभाग असल्याचे त्याने सांगितले. विशेष म्हणजे, प्रसाद महाजन हा शनिपेठ पोलीस ठाण्यातील खुनाच्या गुन्ह्यातील फरार आरोपी असल्याचे उघड झाले. यानंतर १९ नोव्हेंबर रोजी माऊली नगरातून प्रसाद उर्फ परेश महाजन यालाही अटक करण्यात आली. दोघांकडून एकूण ८ ग्रॅम वजनाची, किंमत अंदाजे ८० हजार रुपये असलेली सोन्याची लगड पोलिसांनी हस्तगत केली आहे. या कारवाईमुळे परिसरातील नागरिकांमध्ये समाधानाची भावना निर्माण झाली आहे.
संपूर्ण तपास आणि कारवाई पोलीस निरीक्षक बबन आव्हाड यांच्या मार्गदर्शनाखाली करण्यात आली. तपास पथकात पोउनि राहुल ताडे, पोउनि चंद्रकांत के., सफौ विजयसिंग पाटील, पोह प्रदीप चौधरी, पोह गिरीश पाटील, पोह प्रमोद लावंजारी, पोह किरण पाटील ठाकूर, पोकॉ किरण पाटील, पोकॉ शशिकांत मराठी, पोकॉ चेतन पाटील यांचा समावेश होता. तसेच डॉ. महेश्वर रेड्डी (पोलीस अधीक्षक, जळगाव), मा. अशोक नखाते (अपर पोलीस अधीक्षक), मा. नितीन गणापुरे (उपविभागीय पोलिस अधिकारी) यांच्या मार्गदर्शनाचा लाभ घेतला गेला.
