जळगाव मिरर | २६ जानेवारी २०२६
देशभरात आज ७७ वा प्रजासत्ताक दिन मोठ्या उत्साहात आणि अभिमानाने साजरा केला जात आहे. या निमित्ताने महाराष्ट्रभर विविध ठिकाणी ध्वजवंदनाचे कार्यक्रम आयोजित करण्यात आले आहेत. राजधानी मुंबईत छत्रपती शिवाजी महाराज पार्क येथे मुख्यमंत्री देवेंद्र फडणवीस यांच्या हस्ते ध्वजवंदन करण्यात आले. यावेळी त्यांनी राष्ट्राला संबोधित करत सर्व नागरिकांना प्रजासत्ताक दिनाच्या शुभेच्छा दिल्या.
मुख्यमंत्री फडणवीस यांनी आपल्या भाषणात देशाच्या एकता, अखंडता आणि संविधानिक मूल्यांचे महत्त्व अधोरेखित करत विकसित महाराष्ट्र व विकसित भारताच्या संकल्पाचा पुनरुच्चार केला. दरम्यान, उपमुख्यमंत्री एकनाथ शिंदे यांनी ठाण्यातील साकेत मैदानावर ध्वजवंदन केले. पुण्यात उपमुख्यमंत्री अजित पवार यांच्या हस्ते ध्वजवंदन समारंभ संपन्न झाला. या सर्व कार्यक्रमांना मंत्री, लोकप्रतिनिधी, वरिष्ठ प्रशासकीय अधिकारी, पोलीस अधिकारी तसेच नागरिक मोठ्या संख्येने उपस्थित होते.
प्रजासत्ताक दिनानिमित्त शालेय विद्यार्थ्यांचे संचलन, सांस्कृतिक कार्यक्रम आणि देशभक्तीपर गीतांनी संपूर्ण वातावरण देशप्रेमाने भारावून गेले आहे.
