जळगाव मिरर | ४ जून २०२६
जळगाव शहरातील उन्हाळ्यामुळे होत असलेला रक्ताचा तुटवडा लक्षात घेऊन आर. जी. ज्वेलर्स, नवी पेठ, जळगाव येथे आयोजित करण्यात आलेल्या रक्तदान शिबिरास नागरिकांचा उत्स्फूर्त प्रतिसाद लाभला.
थॅलेसेमिया, सिकल सेल, अपघातग्रस्त, गर्भवती महिला तसेच विविध गंभीर आजारांनी ग्रस्त रुग्णांना नियमित रक्ताची आवश्यकता असते. जळगाव जिल्ह्यातील सुमारे ४०० थॅलेसेमियाग्रस्त रुग्णांना सातत्याने रक्ताची गरज भासत असल्याने या शिबिराचे विशेष महत्त्व अधोरेखित झाले.
रक्तदान शिबिरासाठी रेड क्रॉस ब्लड बँकेचे मोलाचे सहकार्य लाभले. रक्त संकलन व वैद्यकीय प्रक्रिया अनुभवी वैद्यकीय पथकाच्या देखरेखीखाली पार पडली.
शिबिरादरम्यान युवक, महिला, व्यावसायिक तसेच विविध क्षेत्रातील नागरिकांनी स्वयंस्फूर्तीने सहभाग नोंदविला. रक्तदानामुळे अनेक गरजू रुग्णांना जीवनदान मिळू शकते, या सामाजिक जाणिवेतून नागरिकांनी मोठ्या संख्येने रक्तदान केले.
आयोजकांच्या वतीने सर्व रक्तदाते, स्वयंसेवक, वैद्यकीय पथक तसेच सहकार्य करणाऱ्या नागरिकांचे आभार व्यक्त करण्यात आले. भविष्यातही अशा सामाजिक उपक्रमांमध्ये नागरिकांनी सक्रिय सहभाग नोंदवावा, असे आवाहन यावेळी करण्यात आले. रक्तदान हे श्रेष्ठ दान मानले जाते. “रक्तदान करा – जीवनदान द्या” हा संदेश देत शिबिराची यशस्वी सांगता करण्यात आली.
