जळगाव मिरर | ११ मे २०२५
गेल्या चार दिवसापासून भारत आणि पाकिस्तानमध्ये तणावाचे वातावरण असून शनिवारी सायंकाळी शस्त्रसंधी लागू करण्यात आली. मात्र त्यानंतर काही तासांतच पाकिस्तानने पुन्हा जम्मू काश्मीरमध्ये हल्ला केला. त्यामुळे आता पुन्हा भारत पाकिस्तान युद्ध सुरू होणार की काय असा प्रश्न उपस्थित झाला आहे. अमेरिकेचे अध्यक्ष डोनाल्ड ट्रम्प यांनी मध्यस्थी करत भारत आणि पाकिस्तान तात्काळ शस्त्रसंधी करण्यासाठी तयार झाले आहेत, अशी घोषणा केली होती. त्यानंतरही पाकिस्तानने हल्ला केला. यावर राज्याचे उपमुख्यमंत्री एकनाथ शिंदे यांनी प्रतिक्रिया दिली आहे. कुत्र्याचे शेपूट वाकडेच असते, अशी टीका त्यांनी केली आहे.
एकनाथ शिंदे म्हणाले, जेव्हा शस्त्रसंधी झाली होती. त्यानंतर पाकिस्तानी लष्कराचे डीजीएमओ यांनी भारताच्या डीजीएमओशी चर्चा करून पुढाकार घेतला होता. दोन्ही देशांच्या संमतीने शस्त्रसंधी झाली होती. भारत नेहमी जो शब्द देतो, तो पाळतो. पण, पाकिस्तानचे हे कृत्य, हा विश्वासघातकीपणा आहे, असे शिंदे म्हणाले आहेत, ते ठाण्यात माध्यमांशी बोलत होते.
पुढे बोलताना एकनाथ शिंदे म्हणाले, यापूर्वीही त्यांनी अनेक वेळा शस्त्रसंधीचे उल्लंघन केलेले आहे. मोदींनी त्यांना सुधारण्याची संधी देण्यासाठी दिली होती, पण मला नाही वाटत की ते सुधरतील. आता रात्री त्यांनी जे केले आहे, आपल्या नागरिकांवर हल्ला करण्याचा प्रयत्न. पण, पाकिस्तानला चोख प्रत्युत्तर मिळाले आहे.
आपले सैन्य पूर्णपणे तयार आहे. मोदींना कदाचित माहिती होतं की, असे कृत्य करतील. त्यामुळे पंतप्रधान मोदींनी शस्त्रसंधीबद्दल ट्विटही केले नव्हते. पण, वारंवार अशी कृत्ये केल्यानंतर पाकिस्तानला धडा शिकवला जाईल. भारतीय लष्कर इतकं शक्तिशाली आहे की, पाकिस्तानला रात्री जशास तसे उत्तर रात्रीच दिले आहे, असेही एकनाथ शिंदे म्हणाले.
एकनाथ शिंदे म्हणाले, पाकिस्तानला माहित आहे की, भारतासोबत लढणे सोपे नाहीये. भारतासोबत लढलो, तर पराभव होईल. आमचे अस्तित्वही मिटेल. मी तर म्हणेल की, कुत्र्याचे शेपूट असते, ते सरळ नाही होत, ती वाकडीच राहते. त्यासाठी तिला कापावे लागते. पाकिस्तान सुधरला नाही, तर राष्ट्रभक्त पंतप्रधान मोदी त्याचा पूर्ण बंदोबस्त करतील. विश्वासघात करणाऱ्या पाकिस्तानला उत्तर देतील. मी आधीही म्हणालो की, जगाच्या नकाशावरून पाकिस्तानचे नामोनिशाण मिटवण्याची हिमंत भारतामध्ये आहे. शस्त्रसंधी करून हल्ले करत आहे. हा पाकिस्तानचा दुटप्पीपणा आहे. त्याला सगळे मिळून उत्तर देतील.
