जळगाव मिरर | २६ ऑगस्ट २०२४
रेल्वे रुळ ओलांडतांना धावत्या रेल्वेखाली आल्याने अविनाश सुरेश देवेर (वय २७, रा. नशिराबाद, ता. जळगाव) या तरुणाचा दुर्देवी मृत्यू झाला. ही घटना दि. २४ रोजी सकाळी अकरा वाजता भादली रेल्वे स्टेशनजवळ घडली. जिल्हा शासकीय वैद्यकीय महाविद्यालयात रविवारी २५ ऑगस्ट रोजी सकाळी शवविच्छेदन केल्यानंतर मृतदेह नातेवाईकांच्या ताब्यात देण्यात आले. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील नशिराबाद येथे अविनाश देवरे हा तरूण आपल्या आईवडील, भाऊ आणि बहिण यांच्या सोबत वास्तव्याला होता. जळगाव एमआयडीसीतील सिध्दार्थ केमीकल कंपनीत तो कामाला होता. नेहमीप्रमाणे शनिवार दि. २४ ऑगस्ट रोजी अविनाश देवरे हा घरुन कामाला जाण्यासाठी निघाला. त्यानंतर भादली रेल्वेस्टेशन जवळ रेल्वे रूळ ओलांडत असतांना तो धावत्या रेल्वेखाली आल्याने त्याचा दुदैवी मृत्यू झाला. या घटनेची माहिती मिळाल्यानंतर नशिराबाद पोलीस ठाण्यात पोलीस कर्मचारी यांनी घटनास्थळी धाव घेतली. त्यानंतर मृतदेहाचा पंचनामा करून जिल्हा शासकीय वैद्यकीय महाविद्यालयात रवाना करण्यात आला.
अविनाश हा घरात मोठा असल्याने तो घरातील कर्ता होता. दुर्देवी काळाने त्याच्या झडप घालीत त्याला हिरावून घेतले. त्यामुळे त्याच्या कुटुंबियांवर दुःखाचा डोंगर कोसळला आहे. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे. त्याच्या पश्चात आई प्रमिलाबाई, वडील सुरेश देवरे, लहान भाऊ अनिल आणि लहान बहिण असा परिवार आहे.
रेल्वेच्या धडकेत मयत झालेला अविनाश याचा मंगळवार दि. २७ रोजी वाढदिवस होता. त्याच्या मित्रांकडून त्याच्या वाढदिवस जल्लोषात साजरा केला जाणार होता. मात्र त्यापुर्वीच त्याच्यावर दुर्देवी काळाने झडप घातली.
