जळगाव मिरर | ११ ऑगस्ट २०२४
नाशिक येथे उपचारासाठी रुग्णाला घेवून जाणाऱ्या रुग्णवाहिकेचा आणि कारचा अपघात झाला. या अपघातात रुग्णवाहिकेतील ह.भ.प. ज्ञानेश्वर हरी बच्छे (वय २७, रा. सायगाव बगळी, ता. चाळीसगाव) या अपघातग्रस्त तरुणाचा दुर्देवी मृत्यू झाला. ही घटना शुक्रवारी सायंकाळी कळवाडी येथे घडली. तसेच अपघातात अन्य २ जण जखमी झाले असून त्यांच्यावर उपचार सुरु आहेत.
सविस्तर वृत्त असे कि, चाळीसगाव तालुक्यातील सायगाव बगळी येथील ज्ञानेश्वर बच्छे हा तरुण भजनी मंडळामध्ये वादक होते. काही दिवसांपुर्वी त्यांच्या दुचाकीचा अपघात झाला झाल्याने ते जखमी झाले होते. त्यांच्यावर नाशिक येथे उपचार करण्यात आले होते. सायगाव येथे घरी परतल्यावर त्यांना पुन्हा मुत्रपिंडाचा त्रास जाणवू लागला. त्यासाठी त्यांना पुढील उपचारासाठी नाशिक येथे रुग्णवाहिकेने नेत असताना शुक्रवारी दिनांक ९ ऑगस्ट रोजी सायंकाळी कळवाडी फाट्याजवळ एर्टिगा कारसह भीषण धडक झाली. या अपघातात अपघातग्रस्त ज्ञानेश्वर बच्छे यांचा मृत्यू झाला, तर अन्य दोनजण जखमी झाले आहेत. त्यांच्या पश्चात पत्नी, दोन मुली, आई, भाऊ असा परिवार आहे. याप्रकरणी पोलिसात अकस्मात मृत्यूची नोंद करण्यात आली आहे.
