जळगाव मिरर | ३ ऑगस्ट २०२५
सैन्य दलातील विजय चिंधा राजपूत (वय ४०, रा. चाळीसगाव) या जवानाचा मोबाईल हॅक करुन त्यांच्या बँक खात्यातून ८ लाख रुपयांची रोकड परस्पर काढून घेत फसवणुक केली. तसेच त्यांच्या मोबाईलचा ताबा घेवून साडेसात लाखांचे कर्ज मंजूर करुन ते वेगवेगळ्या खात्यामध्ये वर्ग केली. ही घटना उघडकीस आल्यानंतर जवानाने सायबर पोलिसात तक्रार दिली असून त्यानुसार गुन्हा दाखल करण्यात आला आहे.
चाळीसगाव येथील विजय राजपूत हे भारतीय सैन्य दलात शिपाई म्हणून नोकरीस आहे. त्यांची जम्मू येथील रामबण येथे नियुक्ती आहे. जून महिन्यात त्यांच्याशी एका अनोळखीने संपर्क साधून ७ लाख ४३ हजार रुपयांचे कर्ज हवे आहे का, असे विचारले. त्यास त्यांनी नकार दिला. त्यानंतर दि. १ जुलै रोजी त्यांना त्यांच्या चाळीसगाव येथील स्टेट बँकेत असलेल्या खात्यातून १३ हजार १३६ रुपये डेबिट झाल्याचा मेसेज आला. खात्यातून रक्कम वजा झाल्याने राजपूत हे सुटी घेऊन चाळीसगाव येथे आले. त्यांनी स्टेट बँक ऑफ इंडियाच्या शाखेत चौकशी केली असता त्यांच्या नावावर ७ लाख ४३ हजार रुपयांचे कर्ज मंजूर झाले, त्याच्या हप्त्याची रक्कम म्हणून १३ हजार १३६ रुपये डेबिट झाल्याचे त्यांना सांगण्यात आले.
जवान विजय राजपूत यांनी आपण कोणत्याही कर्जाची मागणी केली नसल्याचे बँकेतील कर्मचाऱ्यांना सांगितले. त्यावेळी बँकेच्या कर्मचाऱ्यांनी त्यांना त्यांच्या खात्याचा तपशील दाखविला. यामध्ये दि. १३ जून रोजी त्यांच्या खात्यावर सात लाख ४३ हजार रुपये कर्जाची रक्कम जमा झाल्याचे समजले. विजय राजपूत यांच्या मोबाईलमध्ये बँकेचे अॅप असून त्याद्वारे ते ऑनलाईन व्यवहारही करतात. याच मोबाईलचा सायबर गुन्हेगाराने अॅक्सेस मिळवून परस्पर कर्ज मंजूर करून घेत कर्जाच्या रकमेसह खात्यातील इतर रक्कमही काढून घेतल्याचे त्यांना समजले. आपली फसवणुक झाल्याचे लक्षात येताच विजय राजपूत या जवानाने तात्काळ सायबर पोलिस ठाण्यात धाव घेत फिर्याद दिली. त्यावरून अज्ञाताविरुद्ध गुन्हा दाखल करण्यात आला आहे. पुढील तपास पोलिस निरीक्षक सतीश गोराडे करीत आहेत.
