जळगाव मिरर | ७ डिसेंबर २०२५
शहरातील हरिविठ्ठल नगर परिसरात राहत्या घरात घरगुती वापराच्या गॅस सिलिंडरचा साठा करून त्याद्वारे बेकायदेशीर गॅस रिफिलींग करणाऱ्यावर उपविभागीय पोलीस अधिकारी नितीन गणापुरे यांच्या पथकाने धडक कारवाई केली. या कारवाईत तीन घरगुती गॅस सिलींडर आणि गॅस रिफिलींगचे साहित्य, असा एकूण १९,९५० रुपयांचा ऐवज जप्त करण्यात आला. ही कारवाई शनिवारी, दि. ६ रोजी सकाळी सव्वा नऊ वाजता हरिविठ्ठल नगरात करण्यात आली. या प्रकरणी शशिकांत शिवाजी मराठे (वय ४५, रा. हरिविठ्ठल नगर) याच्याविरुद्ध गुन्हा दाखल करण्यात आला आहे.
उपविभागीय पोलीस अधिकारी नितीन गणापुरे यांना हरिविठ्ठल नगर परिसरात मारोती मंदिरासमोरील एका घरामध्ये घरगुती गॅस सिलिंडरमधून बेकायदेशीररित्या गॅस ‘हंडी’मध्ये रिफिलींग केल्याची माहिती मिळाली. ही माहिती खात्रीशीर असल्याचे लक्षात येताच त्यांनी तत्काळ रामानंद नगर पोलीस ठाण्याचे पोलीस निरीक्षक राजेंद्र गुंजाळ यांना कारवाईचे निर्देश दिले. निरीक्षक गुंजाळ यांच्या सूचनेनुसार पोहेकॉ उमेश पाटील, प्रमोद पाटील, राहुल चौधरी आणि विठ्ठल फुसे यांच्या पथकाने तत्काळ पत्ता शोधून छापा टाकला. शशिकांत मराठे यांच्या घरात छापा मारताच पथकाला एका सिलिंडरमधून दुसऱ्या सिलिंडरमध्ये गॅस रिफिलींग करताना आरोपी प्रत्यक्ष हातावर मिळून आला.
कारवाईदरम्यान घरगुती वापराचे ३ भरलेले गॅस सिलींडर, गॅस भरण्याची मोटार, वजन काटा, रेग्युलेटर अशा साहित्यासह एकूण १९,९५० रुपयांचा मुद्देमाल पोलिसांनी जप्त केला. गॅस रिफिलींगसारख्या धोकादायक आणि कायद्याविरोधातील प्रकारांनी परिसरातील नागरिकांच्या सुरक्षेला मोठा धोका निर्माण होतो. या प्रकरणी पुढील तपास रामानंद नगर पोलिसांकडून सुरू आहे.
