जळगाव मिरर | १३ नोव्हेंबर २०२६
जामनेर तालुक्यातील नेरी येथील कोळीवाडा भागात दिवाळीसाठी माहेरी आलेल्या विवाहितेचा भाऊबिजेच्या आदल्या दिवशीच विजेच्या धक्क्याने दुर्दैवी मृत्यू झाला. ही हृदयद्रावक घटना मंगळवारी, १० रोजी सकाळी घडली.
मिळालेल्या माहितीनुसार, सोनाली राजू इंगळे (२५, रा. कापूसवाडी, ता. जामनेर) असे मयत विवाहितेचे नाव आहे. सोनाली ह्या दिवाळी व भाऊबीज सणानिमित्त सोमवारी कापूसवाडीहून माहेरी नेरी येथे आई-वडिलांकडे आल्या होत्या. मंगळवारी सकाळी त्या आपल्या मुलांना अंघोळ घालत असताना गरम पाण्यासाठी ठेवलेल्या इलेक्ट्रिक हिटर लावलेल्या बादलीला त्यांचा अचानक स्पर्श झाल्याने त्यांना विजेचा जोरदार धक्का बसला. ही बाब लक्षात येताच कुटुंबीयांनी तत्काळ विजेच्या संपर्कातून दूर केले. जामनेर उपजिल्हा रुग्णालयात आणले असता वैद्यकीय अधिकाऱ्यांनी तपासणी करून त्यांना मृत घोषित केले. सोनाली यांच्या पश्चात आठ वर्षांची मुलगी व सहा वर्षांचा मुलगा अशी दोन लहान मुले आहेत. या घटनेची नेरी आऊट पोस्ट पोलिसांत अकस्मात मृत्यूची नोंद करण्यात आली आहे
