जळगाव मिरर | १८ ऑगस्ट २०२५
जळगाव शहरासाठी अभिमानाची आणि अध्यात्मिक उर्जा देणारी घटना शनिवार (दि. १७ ऑगस्ट २०२५) रोजी सायंकाळी साक्षात अनुभवली. शहराचे लोकप्रिय आमदार सुरेश भोळे (राजू मामा) यांच्या पुढाकाराने आयोजित अयोध्या-काशी मोफत रेल्वे यात्रा तब्बल २ हजार भाविकांसह जय श्रीरामच्या जयघोषात जळगावहून रवाना झाली.
या अयोध्या स्पेशल रेल्वेला जळगाव रेल्वे स्थानकावरून मा. ना. गिरीश महाजन (केंद्रीय क्रीडा राज्यमंत्री), ना. रक्षाताई खडसे, खासदार स्मिताताई वाघ, आमदार सुरेश भोळे, जिल्हा महानगर अध्यक्ष दीपक सूर्यवंशी आणि ग्रामीण अध्यक्ष डॉ. राधेश्याम चौधरी यांच्या उपस्थितीत हिरवा झेंडा दाखवून रवाना करण्यात आले.
रेल्वे स्थानकावर “जय श्रीराम”, “हर हर महादेव” चा गजर करत भक्तिमय वातावरणात भाविकांनी मोठ्या उत्साहात यात्रा सुरू केली. या यात्रेची विशेष बाब म्हणजे, आमदार सुरेश भोळे आणि माजी महापौर सीमाताई भोळे स्वतः भाविकांसोबत रेल्वे प्रवास करत आहेत. कार्यकर्ते व भाजप पदाधिकारी देखील यात्रेत सहभागी झाले आहेत. या यात्रेमुळे गरजू आणि श्रद्धाळू नागरिकांना अयोध्या व काशीसारख्या पवित्र स्थळांचे दर्शन मोफत करता येणार असून, हा अध्यात्मिक अनुभव कायमच स्मरणात राहील, असा विश्वास यावेळी आमदार भोळे यांनी व्यक्त केला. भाविकांसाठी केलेला हा प्रयत्न एक सामाजिक आणि धार्मिक उपक्रम ठरत असून, संपूर्ण जळगाव शहरातून या अभिनव यात्रेचे कौतुक होत आहे.
