जळगाव मिरर | २८ जुलै २०२६
अमली पदार्थांच्या तस्करीविरोधात चोपडा ग्रामीण पोलिसांनी मोठी आणि धडक कारवाई करत तब्बल ७ किलो ११६ ग्रॅम वजनाचा व १ लाख ७७हजार ९०० रुपयांचा गांजा जप्त केला आहे. या कारवाईत तीन संशयितांना अटक करण्यात आली आहे.
या प्रकरणी पोलिसांनी एकूण ६ लाख ८ हजार ९०० रुपयांचा मुद्देमाल हस्तगत केला आहे. या कारवाईमुळे परिसरातील अमली पदार्थांच्या अवैध प्रकारांना धक्का बसला आहे. दरम्यान, चोपडा पोलिसांना मिळालेल्या गोपनीय माहितीच्या आधारे २६ रोजी रात्री सुमारे १२ वाजता लासूर ते हातेड मार्गावरील पाटचारीजवळ हातेड शिवारात संशयित वाहनाची तपासणी करण्यात आली. तपासणीदरम्यान कारमध्ये लपवून ठेवलेला ७ किलो ११६ ग्रॅम गांजा आढळून आला. पोलिसांनी तत्काळ कारवाई करत तिघा आरोपींना ताब्यात घेतले. यामध्ये विष्णू सुभाष सुळ (रा. पिंप्री, जि. पुणे), प्रकाश बबन शिंदे आणि प्रशांत ताराचंद अथाणी (दोघेही रा. टाकळीमिया, ता. राहुरी, जि. अहिल्यानगर) यांचा समावेश आहे.
कारवाई दरम्यान पोलिसांनी १ लाख ७७हजारांचा गांजा, ३ लाखांची हुंडाई सॅन्ट्रो कार, ९० हजारांची पल्सर दुचाकी तसेच ४१ हजारांचे पाच मोबाईल फोन असा एकूण ६ लाख आठ हजार रुपयांचा मुद्देमाल जप्त केला. चोपडा ग्रामीण पोलिसात गुन्हा दाखल करण्यात आला असून तपास चोपडा पोलीस करत आहेत.
