नाशिक : वृत्तसंस्था
सेवानिवृत्तीनंतरचे रजा रोखीकरणाचे बिल मंजूर करण्यासाठी वीस हजार रुपयांची लाच घेताना आरोग्य विभागाच्या उपसंचालक कार्यालयातील मुख्य प्रशासकीय अधिकारीला लाच घेताना लाचलूपचपत प्रतिबंधक विभागाच्या पथकाने रंगेहाथ अटक केली आहे. गजानन मारोतराव लांजेवार असे लाज घेणाऱ्या अधिकाऱ्याचे नाव आहे.
नाशिकच्या आरोग्य विभागाच्या उपसंचालक कार्यालयातील मुख्य प्रशासकीय अधिकारी गजानन मारोतराव लांजेवारला लाच घेताना लाचलुचपत प्रतिबंधक विभागाने ताब्यात घेतले आहे. लांजेराव हे नाशिकच्या उपसंचालक आरोग्यसेवा या ठिकाणी कार्यरत आहेत. त्यांनी तक्रारदार यांचे सेवानिवृत्तीनंतरचे रजा रोखीकरणाचे बिल मंजूर करण्यासाठी 20 हजार रुपयांच्या लाचेची मागणी करून त्यांना 20 हजारांची लाच स्विकारतांना पकडण्यात आले. लाच लुचपत प्रतिबंधक विभागाचे अधीक्षक सुनील कडासने यांच्या एका मार्गदर्शनाखाली झालेल्या कारवाईत बुधवारी संदर्भ रुग्णालयाच्या आवारातील उपसंचालक कार्यालयात हा सापळा लावण्यात आला होता. एसीबीच्या पथकाने दिलेल्या माहितीनुसार आरोग्य विभागातून धुळे जिल्हा रुग्णालयातील वैद्यकीय अधिकारी पदावरून निवृत्त झालेल्या अधिकाऱ्याने उपसंचालक कार्यालयात त्याच्या कार्यकाळातील रजेच्या रोखीकरणाचे बिल मंजुरीसाठी पाठपुरावा सुरू केला होता. सर्व कागदपत्रे व प्रक्रिया पूर्ण करूनही मुख्य प्रशासकीय अधिकारी लांजेवार यांच्याकडून बिल मंजुरीसाठी टाळाटाळ केली जात होती. लांजेवार यांनी या कामाच्या मोबदल्यात 20 हजार रुपयांची मागणी केली होती. त्यानुसार तक्रारदार सेवानिवृत्त अधिकाऱ्याने लाचलुचपत प्रतिबंधक विभागाशी संपर्क साधून तक्रार केली. त्यानुसार बुधवारी पथकाने संदर्भ रुग्णालयात सापळा रचला असता नियोजनानुसार दुपारी लांजेवार यांच्या दालनातच त्यांना लाच घेताना रंगेहाथ पकडण्यात आले. याबाबत गुन्हा नोंदवण्यात आला आहे