जळगाव मिरर | २९ ऑगस्ट २०२४
पुलाच्या बांधकामासाठी खोदलेल्या खड्याच्या पाण्यात बुडून संतोष यादव धनगर (वय ५५, रा. कडगाव, ता. जळगाव) यांचा मृत्यू झाला. ही घटना कडगाव-जोगलखेडा रस्त्यावर मंगळवारी सायंकाळच्या सुमारास घडली. ठेकेदाराच्या हलगर्जीपणामुळे हे काम अपूर्ण राहिल्याने ही घटना घडल्याचा संताप ग्रामस्थांनी व्यक्त केला आहे. जोपर्यंत ठेकेदारावर गुन्हा दाखल होत नाही. तोपर्यंत मृतदेह ताब्यात घेणार नाही, असा पवित्र नातेवाईकांनी घेतला होता. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील कडगाव येथे संतोष धनगर हे शेतकरी आपल्या पत्नी आणि मुलासह वास्तव्याला होते. शेतीकाम व पशुपालन करून ते आपला उदरनिर्वाह करत होते. नेहमीप्रमाणे मंगळवार दि. २७ ऑगस्ट रोजी दुपारी ते गुरांना चारण्यासाठ घेवून गेले होते. सायंकाळच्या सुमारास घरी परतत असतांना जोगलखेडा ते कडगाव रस्त्यावरील पुलाचे काम करण्यासाठी केलेल्या खड्ड्यात त्यांच्या म्हशी उतरल्या होत्या. पाण्यात गेलेल्या म्हशी या गाव्ळात फसल्याने त्यांना काढण्यासाठी संतोष धनगर हे गेले असता, त्यांच्या पाण्यात बुडून मृत्यू झाल्याची दुर्दैवी मृत्यू झाला. तेथून जाणाऱ्या ग्रामस्थाच्या लक्षात येताच, त्यांनी गावातील इत्तरांना माहिती दिली. त्यानुसार ग्रामस्था तात्काळ घटनास्थळी दाखल झाले. पश्चात पत्नी मालती, मुलगा जयेश असा परिवार आहे.
ग्रामस्थांनी खड्डूयातील पाण्यातून संतोष धनगर यांना बाहेर काढले. ठेकेदाराच्या वेळकाढूपणामुळे शेतकऱ्याचा जीव गेल्याचा आरोप ग्रामस्थांनी केला होता. जोपर्यंत संबंधित ठेकेदारावर गुन्हा दाखल होत नाही तोपर्यंत मृतदेह ताब्यात घेणार नाही, असा नातेवाईक व ग्रामस्थांनी घेतला होता. दरम्यान रात्री ११ वाजता मृतदेह शासकीय वैद्यकीय महाविद्यालयात दाखल करण्यात आला.
