जळगाव मिरर | २५ जुलै २०२५
शहरातील एका परिसरात घरी आलेल्या आईच्या मित्राकडून तिच्याच मुलीसोबत अश्लिल वर्तन करुन विनयभंग करण्यात असल्याची धक्कादायक घटना उघडकीस आली आहे. पीडित मुलीने हा प्रकार आपल्या आईला सांगितल्यावर आईने तिला पाठीशी घालण्याऐवजी आरोपीलाच पाठिंबा दिला. या प्रकरणी शहर पोलीस ठाण्यात आईसह तिचा मित्र मयूर शिंपी (रा. कांचननगर) यांच्याविरुद्ध विनयभंगाचा गुन्हा दाखल केला आहे.
सविस्तर वृत्त असे कि, शहरातील एका भागात पीडित मुलगी वास्तव्यास असून तीने पोलिसात तक्रार दिली आहे. पीडितेचे वडील घरी नसतांना तिच्या आईचा मित्र असलेला मयूर शिंपी हा दि. १५ फेब्रुवारी रोजी सायंकाळी पिझ्झा पार्सल घेवून त्यांच्या घरी आला. तिची आई चहा बनविण्याकरीता किचनमध्ये गेली असता, संशयित मयूर शिंपी हा तिच्याजवळ येवून बसला आणि तिच्यासोबत अश्लिल वर्तन करु लागला. मुलीने ही घटना तिच्या आईला सांगितली असता, तीने तू काय पण सांगत जावू नको असे म्हणून तिच्या बोलण्याकडे दुर्लक्ष केले. या घटने नंतर संशयित मयुर शिंपी याची हिंमत वाढली. २८ फेब्रुवारी पुन्हा एकदा पीडितेचे वडील घरी नसताना शिंपी पीडितेच्या घरी आला. यावेळी पीडितेची आई हजर असतानाच, पुन्हा विनयभंग केला.
संशयिताकडून अश्लिल वर्तन होत असल्यामुळे पीडितेने त्याचा हात झटकला असता, त्यावेळीही पिडीतेच्या आईने, काहीच न बोलता, संशयित आरोपीची पाठराखण केल्याचे फिर्यादीत म्हटले आहे. यानंतर संबधिताने पुन्हा एकदा १२ जून रोजी पीडितेच्या क्लासमध्ये जाऊन, पिडीतेचा विनयभंग केला.संशयिताकडून वारंवार अश्लिल वर्तन करुन विनयभंग केला जात होता. हा प्रकार वाढतच जात असल्याने, शेवटी जाचाला कंटाळून पिडीतेने बुधवारी शहर पोलीस ठाण्यात धाव घेत आपबिती कथन केले. त्यानुसार पिडीतेच्या आईसह संशयित मयूर शिंपी (रा. कांचननगर) यांच्याविरुद्ध गुन्हा दाखल केला आहे. पुढील तपास पोलीस उपनिरीक्षक अशोक खेडकर हे करत आहेत.
