जळगाव मिरर | १० मार्च २०२६
गुरू–शिष्याच्या पवित्र नात्याला काळिमा फासणारी अत्यंत संतापजनक घटना भंडारा जिल्ह्यातील पवनी तालुक्यात उघडकीस आली आहे. वडेगाव येथील जिल्हा परिषद प्राथमिक शाळेतील एका शिक्षकाने निरागस विद्यार्थिनींना मोबाईलवर अश्लील व्हिडिओ दाखवून त्यांच्याशी गैरवर्तन केल्याचा धक्कादायक प्रकार समोर आला आहे. या विकृत कृत्यामुळे संतप्त झालेल्या पालकांनी व ग्रामस्थांनी संबंधित शिक्षकाला भरचौकात चपलेने चोप देत त्याचे कपडे फाडून धडा शिकवला.
मिळालेल्या माहितीनुसार, पवनी तालुक्यातील वडेगाव येथील जिल्हा परिषद प्राथमिक शाळेत पहिली ते चौथीपर्यंतचे वर्ग असून ही एकशिक्षकी शाळा आहे. गेल्या पाच वर्षांपासून अनिल जगन राऊत (वय ५४) हा शिक्षक येथे कार्यरत होता. विद्यार्थ्यांना शिक्षण देण्याऐवजी तो शाळेतील विद्यार्थिनींना मोबाईलवर अश्लील व्हिडिओ दाखवून त्यांच्याशी अश्लील चाळे करत असल्याची माहिती पुढे आली आहे. काही विद्यार्थिनींशी त्याने अत्याचाराचा प्रयत्न केल्याचाही आरोप करण्यात आला आहे.
शाळेतील जवळपास सर्वच मुलींशी त्याने अशा प्रकारचे गैरवर्तन केल्याची प्राथमिक माहिती समोर येताच पालकांमध्ये संतापाची लाट उसळली. हा प्रकार कळताच मंगळवारी सकाळी संतप्त पालक व ग्रामस्थांनी शाळेत धडक देत संबंधित शिक्षकाला जाब विचारला. यावेळी संताप अनावर झालेल्या महिलांनी शिक्षकाला चपलेने मारहाण केली, तर काही पुरुषांनी त्याचे कपडे फाडून त्याला भरचौकात आणत चांगलाच चोप दिला. या घटनेमुळे परिसरात मोठी खळबळ उडाली असून सर्व स्तरातून संताप व्यक्त केला जात आहे.
दरम्यान, तपासादरम्यान आणखी धक्कादायक माहिती समोर आली आहे. अनिल राऊत हा यापूर्वीही अशाच प्रकारच्या प्रकरणात अडकला होता. पाच वर्षांपूर्वी लाखांदूर तालुक्यातील गवराळा येथील शाळेत कार्यरत असताना त्याने विद्यार्थिनींसोबत अश्लील प्रकार केल्याची तक्रार दाखल झाली होती. त्या वेळी लाखांदूर पोलीस ठाण्यात त्याच्याविरुद्ध गुन्हा दाखल करून त्याला निलंबित करण्यात आले होते. नंतर त्याची बदली वडेगाव येथे करण्यात आली होती.
सध्या या प्रकरणी पवनी पोलीस ठाण्यात संबंधित शिक्षकाविरुद्ध कठोर कलमान्वये गुन्हा दाखल करण्याची प्रक्रिया सुरू आहे. अशा विकृत शिक्षकाला कायमचे बडतर्फ करून कठोरात कठोर शिक्षा करण्यात यावी, अशी मागणी ग्रामस्थांनी प्रशासनाकडे केली आहे.
