जळगाव मिरर | ३ जुलै २०२६
कायद्याचा धाक संपला की गुन्हेगारांची नखे कितीवर येतात, याचे जिवंत उदाहरण म्हणजे सध्याचे जळगाव शहर. राज्यभरात ज्या अधिकाऱ्यांच्या नावाने अवैध धंदेवाल्यांना घाम फुटतो, त्या तुकाराम मुंढेंसारख्या अधिकाऱ्यांची दहशत जळगावच्या गुटखा आणि भेसळ माफियांना स्पर्शही करू शकलेली नाही. उलट, तुमचा कायदा आणि तुमचे अधिकारी आमच्या खिशात आहेत, अशा आविर्भावात हे माफिया राजरोसपणे लोकांच्या आयुष्याशी खेळ खेळत आहेत.
बंदी असलेला विषारी गुटखा जळगावातील प्रत्येक चौकात, प्रत्येक टपरीवर उघडपणे विकला जात आहे. केवळ गुटखाच नाही, तर लहान मुलांच्या दुधापासून ते रोजच्या अन्नापर्यंत प्रत्येक गोष्टीत भेसळ करणारे माफिया जळगावात मोकाट फिरत आहेत. हा सगळा काळाबाजार स्थानिक पोलीस, अन्न व औषध प्रशासन आणि महसूल विभागाच्या नाकावर टिच्चून सुरू आहे. डोळे मिटून बसलेल्या या अधिकाऱ्यांना जनतेचा आक्रोश ऐकू येत नाही, कारण यांचे डोळे आणि कान माफियांच्या हप्त्यांनी बंद झाले आहेत का असा प्रश्न उद्भवत आहे. या विषारी गुटख्यामुळे जळगावची तरुण पिढी कॅन्सरसारख्या जीवघेण्या आजारांच्या विळख्यात अडकत चालली आहे. घराघरांमध्ये कर्ते धर्ते तरुण उध्वस्त होत आहेत आणि दुसरीकडे हे पांढरपेशी माफिया सामान्य जनतेच्या रक्तावर स्वतःची घरे भरत आहेत. या नराधमांना ना समाजाची लाज आहे, ना तुकाराम मुंढेंचे भय.
दिखाव्याच्या कारवाईत छोटा मासा अडकतोय ?
शहरातील अनेक ठिकाणी मोठ्या प्रमाणात गुटख्याची साठवणूक झाली आहे मात्र जळगाव शहरातील अधिकारी रस्त्यावरील छोट्या टपऱ्यांवर ५० ते ६० हजारांचा माल पकडून कारवाई केली असल्याचे सांगत आहे मात्र अधिकाऱ्यांच्या हाती छोटे मासे लागत असले तरी यात मोठ्या माश्यांना कोण संरक्षण देत आहे याचा देखील विचार व्हायल हवा.
एमआयडीसीतील कंपनीची चर्चा….
शहरापासून जवळ असलेल्या एमआयडीसी परिसरात एका कंपनीत गुटख्याची मोठ्या प्रमाणात साठवणूक केली जात असल्याची शहरभर चर्चा असली तरी या कंपनीपर्यंत संबधित विभागाचे अधिकारी पोहचतील कि नाही याबाबत मात्र जळगावकरांच्या मनात संशय आहे.
दोन दिवसापूर्वी तीन कारवाई का ?
शहरातील अन्न व औषध प्रशासनाच्या काही अधिकाऱ्यांनी दोन दिवसापूर्वी तीन ठिकाणी कारवाई केली असल्याची चर्चा असून यातील एकावरच गुन्हा दाखल झाला असल्याची चर्चा आहे. त्या दोन दुकानदारांना सोडले कि काय अशी देखील चर्चा दबक्या आवाजात सुरु झाली आहे.
