जळगाव मिरर | २८ डिसेंबर २०२३
राज्यातील एका शहरातून हृदय हेलावून टाकणारी बातमी समोर आली आहे. भरधाव डंपरने स्कूटरला जबर धडक देत चिमुकल्याला चिरडल्याची धक्कादायक घटना घडली आहे. या अपघातात आईसमोरच चिमुकल्याचे दुर्देवी मृत्यू झाला आहे. हि घटना पुण्यातील कात्रज परिसरातील मंतरवाडी चौक भागात घडली आहे.
मिळालेल्या माहितीनुसार, पु्ण्यातील मंतरवाडी कात्रज बायपास रस्त्यावर भरधाव डंपरने अॅक्टीव्हा स्कुटरला जबर धडक दिल्याने स्कुटरवर कु.शौर्य सागर आव्हाळे (वय ८) हा आईसोबत जात असतांना डंपरच्या धडकेने तो रस्त्यावर पडला. आईसमोरच डंपरने मुलाला चिरडले आणि शौर्यचा जागीच मृ्त्यू झाला. डोळ्यासमोर चिमुकल्यावरून डंपर गेला. त्यामुळे शौर्यच्या आईने टाहो फोडला. या घटनेने संपुर्ण परिसरात हळहळ व्यक्त केली जात आहे. शौर्य सागर आव्हाळे याचा मृतदेह पोस्टमार्टमसाठी ससूनमध्ये पाठवण्यात आला आहे.
चिमुकल्याला चिरडल्यानंतर डंपर चालकाने गाडी बाजूला लावली आणि गाडी सोडून पळून गेला. अंगावर काटा आणणाऱ्या या घटनेमुळे स्थानिक संतप्त झाले. संतप्त झालेल्या जमावाने डंपर पेटवून दिला. डंपर पेटवल्यामुळे परिसरात धुराचे लोळ उसळले. ज्या ठिकाणी डंपर पेटवला होता. त्याच्यावर लाईटच्या तारा असल्याने लाईट बंद केली गेली. त्यामुळे मोठी दुर्घटना टळली. डंपर मात्र जळून खाक झाला आहे.या घटनेची माहिती मिळताच हडपसर पोलीस स्टेशनचे अधिकारी घटनास्थळी दाखल झाले. त्यांनी अग्निशमन दलाला बोलावत डंपरला लागलेली आग विझवली.