जळगाव मिरर | ५ ऑगस्ट २०२६
शहरातील हॉटेल दरबार आणि सीएनजी गॅस पंप परिसरात बुधवारी सकाळी झालेल्या भीषण अपघातात भरधाव टँकरने दुचाकीला मागून जोरदार धडक दिल्याने भाजीपाला विक्री करून कुटुंबाचा उदरनिर्वाह करणाऱ्या मंगला अर्जुन माळी (वय ५५, रा. ज्ञानदेव नगर) यांचा जागीच दुर्दैवी मृत्यू झाला. या अपघातात त्यांचा मुलगा भरत माळी (वय २९) किरकोळ जखमी झाला असून, अपघातानंतर टँकर चालकाने पलायनाचा प्रयत्न केला. मात्र, सतर्क नागरिकांनी पाठलाग करून त्याला पकडत एमआयडीसी पोलिसांच्या ताब्यात दिले.
मिळालेल्या माहितीनुसार, गेल्या अनेक वर्षांपासून मंगला माळी या भाजीपाला विक्रीचा व्यवसाय करून आपल्या कुटुंबाचा उदरनिर्वाह करत होत्या. बुधवारी सकाळी त्या नेहमीप्रमाणे मुलगा भरत याच्यासोबत दुचाकीवरून पिंप्राळा येथील आठवडे बाजारात भाजीपाला विक्रीसाठी निघाल्या होत्या. हॉटेल दरबार आणि सीएनजी गॅस पंप परिसरात पोहोचताच भरधाव वेगाने आलेल्या टँकरने त्यांच्या दुचाकीला मागून जोरदार धडक दिली. धडकेचा जोर इतका भीषण होता की, मंगला माळी या रस्त्यावर फेकल्या गेल्या आणि त्यांच्यावरून टँकर गेल्याने त्यांचा जागीच मृत्यू झाला. तर, दुचाकी चालवत असलेला त्यांचा मुलगा भरत माळी किरकोळ जखमी झाला.
अपघातानंतर टँकर चालकाने वाहन न थांबवता पाळधीच्या दिशेने पळ काढण्याचा प्रयत्न केला. मात्र, घटनास्थळी उपस्थित नागरिकांनी तत्काळ धाडस दाखवत टँकरचा पाठलाग केला. आकाशवाणी चौकातील महादेव हॉस्पिटलसमोर चालकाला अडवून त्याला एमआयडीसी पोलिसांच्या ताब्यात देण्यात आले. घटनेनंतर मंगला माळी यांचा मृतदेह शवविच्छेदनासाठी शासकीय वैद्यकीय महाविद्यालय व रुग्णालयात आणण्यात आला. ही बातमी समजताच नातेवाईक, मित्रपरिवार आणि परिसरातील नागरिकांनी रुग्णालयात मोठी गर्दी केली. कुटुंबीयांचा आक्रोश पाहून उपस्थितांचे डोळे पाणावले.
मंगला माळी या आपल्या कष्टाच्या जोरावर कुटुंबाचा सांभाळ करत होत्या. त्यांच्या पश्चात पती, दोन मुले, दोन सुना आणि नातवंडे असा मोठा परिवार आहे. एका निष्पाप आणि कष्टकरी महिलेचा बेपर्वा वाहनचालकामुळे झालेला मृत्यू अत्यंत दुर्दैवी असल्याची भावना नागरिकांनी व्यक्त केली. या घटनेनंतर शहरातील भरधाव अवजड वाहनांवर नियंत्रण आणण्याची, वाहतूक नियमांची कठोर अंमलबजावणी करण्याची आणि निष्काळजी वाहनचालकांवर कठोर कारवाई करण्याची मागणी नागरिकांकडून जोर धरत आहे. पोलिसांकडून अपघाताचा पुढील तपास सुरू आहे.
