जळगाव मिरर | ४ जुलै २०२६
महावितरणकडून ३३ केव्ही उच्चदाब विद्युत वाहिनीवर देखभाल व दुरुस्तीची कामे हाती घेण्यात आल्याने जळगाव शहराच्या पाणीपुरवठ्यावर परिणाम होणार आहे. वाघूर पंपिंग स्टेशनचा वीजपुरवठा शनिवार (दि. ४ जुलै) रोजी सकाळी १० ते सायंकाळी ५ वाजेपर्यंत बंद राहणार असल्यामुळे शहराचा पाणीपुरवठा एक दिवस उशिराने करण्यात येणार असल्याची माहिती महापालिकेच्या पाणीपुरवठा विभागाने दिली आहे. नागरिकांनी पाण्याचा काटकसरीने व जपून वापर करावा, असे आवाहनही करण्यात आले आहे. महावितरणतर्फे नियोजित देखभाल व दुरुस्तीच्या कामामुळे वाघूर पंपिंग स्टेशनला वीजपुरवठा खंडित राहणार आहे. परिणामी जलशुद्धीकरण केंद्राचे काम दिवसभर बंद राहणार असून, त्याचा थेट परिणाम शहरातील नियमित पाणीपुरवठ्यावर होणार आहे.
महापालिकेने दिलेल्या माहितीनुसार, ४ जुलै रोजी होणारा पाणीपुरवठा आता ५ जुलै रोजी, तर ५ जुलैचा पाणीपुरवठा ६ जुलै रोजी करण्यात येईल. त्याचप्रमाणे पुढील दिवसांचे वेळापत्रकही एक दिवसाने पुढे ढकलण्यात आले आहे. नटराज टाकी ते चौगुले मळा, शनिपेठ, नवीपेठ मिल परिसर, आकाशवाणी टाकी, हेमूकलानी टाकी, गिरणा टाकी, नित्यानंद टाकी, डीएसपी शहूनगर, प्रतापनगर, के.सी. पार्क, गेंदालाल टाकी तसेच मिल्लतनगर पाण्याची टाकी परिसरात ५ जुलै रोजी पाणीपुरवठा करण्यात येणार आहे. नित्यानंदनगर टाकी परिसर, खंडेरावनगर, पिंप्राळा परिसर, दांडेकरनगर टाकी परिसर, डीएसपी टाकीचा काही भाग, अयोध्यानगर, मेहरूण तसेच आसपासच्या भागांना ६ जुलै रोजी पाणीपुरवठा केला जाईल.
पिंप्राळा परिसरातील दुसऱ्या दिवसाचा नियोजित पाणीपुरवठा देखील पुढे ढकलण्यात आला असून, मानराज टाकी, खोटेनगर टाकी, नित्यानंद टाकी, रायसोनीनगर, डीएसपी टाकी, गिरणा टाकी, अयोध्यानगर आदी भागांना ६ जुलैऐवजी ७ जुलै रोजी पाणीपुरवठा करण्यात येणार आहे. महापालिकेच्या पाणीपुरवठा विभागाने नागरिकांना आवश्यक तेवढेच पाणी वापरण्याचे, पाण्याचा अपव्यय टाळण्याचे आणि सुधारित वेळापत्रकानुसार सहकार्य करण्याचे आवाहन केले आहे. नियोजित देखभाल पूर्ण झाल्यानंतर पाणीपुरवठा पूर्ववत करण्यात येणार असल्याचेही प्रशासनाने स्पष्ट केले आहे.
