जळगाव मिरर । ९ जानेवारी २०२३
विद्यार्थ्यांचा सर्वांगीण विकास साधावयाचा असेल तर शिक्षकांनी स्वतःला अपडेट केले पाहिजे. नवीन राष्ट्रीय शैक्षणिक धोरणात नमूद केल्याप्रमाणे शिक्षकांनी आपला व्यावसायिक विकास सातत्याने वाढवल्यास त्याचा विद्यार्थ्यांना नक्कीच लाभ होतो, असे प्रतिपादन मुख्याध्यापिका सुनीता पाचपांडे यांनी केले.
न्हावी, ता. यावल येथील श्री शारदा माध्यमिक विद्यालयात आयोजित सत्कार समारंभात त्या बोलत होत्या. भुसावळ येथील रहिवासी तथा बालभारतीच्या मराठी भाषा अभ्यास मंडळाचे सदस्य डॉ. जगदीश पाटील हे राष्ट्रीय पात्रता परीक्षा म्हणजेच नेट परीक्षा पात्र झाल्याबद्दल त्यांचा विद्यालयातर्फे सत्कार करण्यात आला. यावेळी भरत फिरके व सुनीता पाचपांडे यांनी डॉ. जगदीश पाटील यांचा शाल, श्रीफळ व पुष्पगुच्छ देऊन सन्मान केला. भरत फिरके यांनी डॉ. जगदीश पाटील यांच्या कार्याचा गौरव केला. डॉ. पाटील हे सातत्याने शिक्षणक्षेत्रात कार्यमग्न राहून धडपडत असतात. त्यांच्या ज्ञानाचा व कार्याचा लाभ शिक्षकांसह विद्यार्थ्यांना सातत्याने मिळत असतो. त्यांचे कार्य इतरांसाठी प्रेरणादायी असल्याने त्यांचा सन्मान शारदा माध्यमिक विद्यालयातर्फे करण्यात आल्याचे आयोजक ललितकुमार फिरके यांनी सांगितले. सत्कारार्थी मनोगत व्यक्त करताना डॉ. जगदीश पाटील म्हणाले की, फिरके परिवार हा रत्नपारखी परिवार आहे. चांगल्या गोष्टींचे कौतुक करणे व प्रोत्साहन देवून उत्साह वाढवणे हे त्यांच्याकडून शिकले पाहिजे. सत्कार समारंभ हे प्रोत्साहन देऊन कामाची ऊर्जा वाढवण्याचे कार्य करत असतात. कौतुकाची थाप पाठीवर मिळाल्यास ज्याचे कौतुक झाल्यास त्याला काम करण्यास प्रोत्साहन मिळते तर इतरांना त्याच्यापासून प्रेरणा मिळत असते. 2012 मध्ये पीएच.डी. पदवी प्राप्त झाल्यानंतर पहिला सत्कार आणि 2022 मध्ये नेट परीक्षा पात्र झाल्यानंतर सुद्धा पहिला सत्कार याच शारदा माध्यमिक विद्यालयाने केला असल्याने माझ्या आयुष्यातील हा अविस्मरणीय आणि आनंदाचा क्षण असल्याचे देखील डॉ. जगदीश पाटील यांनी सांगितले. सूत्रसंचालन वाय. एन. तळेले यांनी तर आभार लक्ष्मण पाटील यांनी मानले. यावेळी हभप लक्ष्मण महाराज व श्रद्धा-भक्ती यांची उपस्थिती होती.
