जळगाव मिरर | २१ मे २०२३
बेटावदकडून अमळनेरकडे मोटरसायकलवर येत असताना जैतपीरच्या पुढे गलवाडे गावाजवळ मागून आलेल्या अज्ञात वाहनाने धडक दिल्याने दुचाकीस्वार तरुण ठार झाला तर एक जण गंभीर जखमी झाला आहे. ही घटना दि. १९ रोजी रात्री उशिरा घडली. मात्र, अज्ञात वाहनाच्या धडकेने दोन्ही तरुण नाल्यात पडले. ते रात्रभर तसेच पडून होते. पहाटेच्या सुमारास हा प्रकार स्थानिकांच्या लक्षात आला. शुभम बाविस्कर (वय २६, रा. तांबेपुरा) असे मयत तरुणाचे नाव आहे. तर, त्याचा मित्र शाहिद शेख हा जखमी झाला.
मिळालेल्या माहितीनुसार, अपघातानंतर दोघे जण रात्रभर रस्त्याशेजारील नाल्यात पडून होते, सकाळीच ही घटना उघडकीस आली. शुभम हा एका दुकानात काम करत होता. बेटावद येथे त्याचे काम असल्याने दि. १९ रोजी रोजी सायंकाळी दुकान मालकाची दुचाकी एम एच १९ बी व्ही ६६२३ घेत मित्र शाहिद शेख याला सोबत घेऊन तो गेला. तिथून रात्री परत येत असताना गलवाडे गावाच्या आधी कोणत्यातरी अज्ञात वाहनाने त्यांना मागून धडक दिली. ते रस्त्यालगत दुचाकीसह नाल्यात जाऊन पडले. रात्री उशिरापर्यंत घरी न आल्याने भाऊ व मित्र परिवाराने त्यांचा त्या रस्त्यावर शोध घेतला. मात्र, ते मिळून आले नाहीत, अखेर सकाळी ६ वाजता शौचालयास जाणाऱ्या व्यक्तींच्या ते निदर्शनास आल्याने त्यांनी १०८ रुग्णवाहिका बोलावून रुग्णालयात रवाना केले, यात शुभम याचा मृत्यू झाला होता. तर, शाहिद हा गंभीर जखमी आहे. त्याच्यावर खासगी रुग्णालयात उपचार सुरू आहेत. शुभमच्या आईचे गेल्या वर्षीच कोरोनाने निधन झाले. त्याच्या पश्चात वडील, लहान भाऊ असा परिवार आहे. शुभमचे मामा आत्माराम अहिरे यांनी मारवड पोलिस स्टेशनला फिर्याद दिल्यावरून गुन्हा दाखल करण्यात आला आहे.