जळगाव मिरर | २२ जून २०२५
गेल्या काही वर्षापासून सोशल मिडीयावर अनेक व्हिडीओ व्हायरल होत असतात, त्यामुळे अनेक ठिकाणी कारवाई देखील झाली आहे. आता कल्याणमध्ये वाहतूक कोंडीमुळे रस्त्यावर गोंधळाचे वातावरण असताना एक धक्कादायक प्रकार समोर आला आहे. वाहतूक पोलिस हवालदाराने नियमभंग करणाऱ्या तरुणाला थांबवून जाब विचारताच, त्या तरुणाने संतापाच्या भरात पोलिसाला अश्लील शिवीगाळ केली, कॉलर पकडली आणि मारहाण करण्याचा प्रयत्न केला. या प्रकारामुळे परिसरात सुमारे अर्धा तास तणावाचे वातावरण निर्माण झाले. सध्या या तरुणाविरोधात पोलिस ठाण्यात गुन्हा दाखल करण्यात आला आहे.
सविस्तर वृत्त असे कि, कल्याणच्या शहाड उड्डाण पुलाजवळ वाहतूक कोंडीदरम्यान मंगळवारी रात्री 11 वाजण्याच्या सुमारास एक धक्कादायक प्रकार घडला. वाहतूक सुरळीत करण्याचा प्रयत्न करत असलेल्या पोलिस हवालदाराला एका तरुणाने शिवीगाळ केली आणि मारहाण करण्याचा प्रयत्न केला. या प्रकारामुळे परिसरात काही काळ गोंधळाचं वातावरण निर्माण झाले.
शहाड-अहिल्यानगर मार्गावर मोठ्या वाहतूक कोंडीदरम्यान एक धक्कादायक प्रकार घडला. पोलिस हवालदार सचिन ओंबासे वाहतूक सुरळीत करण्याचे काम करत असताना मयूर केणे नावाचा तरुण विरुद्ध दिशेने मोटरसायकल चालवत शहाडकडे जात होता. पोलिसांनी त्याला थांबवून बाजूने जाण्याचा सल्ला दिला. मात्र, या साध्या कारणावरून मयूर संतापला आणि रागाच्या भरात हवालदार ओंबासे यांची कॉलर पकडली, त्यांना ढकलले आणि अश्लील शिवीगाळ करत मारहाण सुरू केली. तू गाववाल्यावर हात उचलतोस, तुला बघून घेतो, अशी धमकी देत मयूरने डोक्यात दगड मारण्याचाही प्रयत्न केला. हा राडा तब्बल अर्धा तास चालला. अखेर आजूबाजूच्या वाहनचालकांनी हस्तक्षेप करत दोघांना वेगळे केले आणि परिस्थिती नियंत्रणात आणली. या घटनेनंतर महात्मा फुले चौक पोलिस ठाण्यात मयूर केणे विरोधात गुन्हा दाखल करण्यात आला असून, पोलिस या प्रकरणाचा पुढील तपास करत आहेत.
