जळगाव मिरर | १३ मे २०२३
शहरातील एका परिसरात असलेल्या हायस्कूलचा वॉचमनचा हौदातून पाणी काढत असताना त्या पाण्यात बुडाल्याने दुर्देवी मृत्यू झाल्याची धक्कादायक घटना शुक्रवार १२ मे रोजी दुपारी तीन वाजेच्या सुमारास घडली. या अपघातात किशोर दत्तात्रय चोधरी (४२, मुंदडा हायस्कूल) असे मयताचे नाव आहे. या प्रकरणी रामानंद नगर पोलिसात अकस्मात मृत्यूची नोंद करण्यात आली.
मिळालेल्या माहितीनुसार, शहरातील पिंप्राळा परिसरातील मुंदडा हायस्कुलमध्ये किशोर चौधरी हे गेल्याआठ वर्षांपासून पत्नी व दोन मुलांसह वास्तव्याला होते. शाळेतील वॉचमनचे काम करून आपला उदरनिर्वाह करीत होते. शुक्रवारी दुपारी तीन वाजेच्या सुमारास किशोर हे शाळेच्या आवारात असलेल्या हौदातून पाणी काढण्यासाठी गेले असता त्याचा तोल जावून ते हौदात पडले व त्यांचा बुडून मृत्यू झाला.
बराच वेळ झाला तरी किशोर हे पाणी घेवून आले नसल्याने ते त्यांना बघण्यासाठी त्यांच्या पत्नी हौदाजवळ गेल्या असता त्यांना आपले पती किशोर हे हौदात बुडालेले दिसून आले. त्यांनी आरडा-ओरड केल्यानंतर परीसरातील नागरीकांनी त्याठिकाणी धाव घेत किशोर चौधरी यांना तत्काळ शासकीय वैद्यकीय रुग्णालयात दाखल केले असता डॉक्टरांनी मृत घोषित केले.
