जळगाव मिरर | २७ जून २०२५
शहरातील गर्दीच्या ठिकाणी किंवा प्रवास करणाऱ्यांच्या खिशातून मौल्यवान वस्तूंसह पैसे लांबविणाऱ्या आंतरजिल्हा टोळीचा एलसीबीने पर्दाफाश केला. या टोळीने मंगळवारी सायंकाळच्या सुमारास नवीन बस स्थानकात बसमध्ये चढणाऱ्या गोपाल किसन बारी (वय ५१, रा. यावल) या फळ विक्रेत्याच्या खिशातून २० हजारांची रोकड चोरुन नेली होती. या टोळीची कसून चौकशी केल्यानंतर त्यांच्याकडून साडेपाच लाखांचा मुद्देमाल हस्तगत करण्यात आला आहे.
सविस्तर वृत असे कि, गर्दीच्या ठिकाणी खिसे कापून चोरी होत असल्याच्या अनेक घटना घडत असून याप्रकरणी गुन्हे देखील दाखल झाले आहेत. हे गुन्हे उघडकीस आणण्याच्या सूचना पोलीस अधीक्षक डॉ. महेश्वर रेड्डी यांनी स्थानिक गुन्हे शाखेला दिल्या होत्या. त्यानुसार पोलीस निरीक्षक संदीप पाटील यांनी पथक तयार करुन या चोरी करणाऱ्यांना निष्पन्न करण्याच्या सूचना दिल्या. दरम्यान, एलसीबीचे प्रवीण भालेराव व अक्रम शेख हे गस्त घालीत असतांना बस स्थानक परिसरात अमरावती येथील खिसे कापणारी टोळी आल्याची माहिती मिळाली. त्यानुसार त्यांनी वरिष्ठांना माहिती दिल्यानंतर लागलीच उपनिरीक्षक शरद बागल, अक्रम शेख, नितीन बाविस्कर, प्रवीण भालेराव, किशोर पाटील, रविंद्र कापडणे यांचे पथक रवाना केले.
हे पथक गस्त घालीत असतांना बस स्थानकात तीन संशयित हे संशयास्पदरित्या फिरतांना दिसले. त्यानुसार अहमद बेग कादर बेग (वय ६२, रा. मुजफ्फरपूरा नागपूरी गेट, अमरावती), हफिज शाह हबीब शाह (वय ४९, रा. बलगाव सकीनगर, अमरावती) व अजर हुसैन हफर हुसेन (वय ४९, रा. सुपिया मजीद समोर, अमरावती) या तिघांना ताब्यात घेतले.
ताब्यात घेतलेल्या संशयितांची कसून चौकशी केली असता, त्यांनी दि. २४ रोजी सायंकाळच्या सुमारास यावल येथील गोपाल किसन बारी (वय ५१) हे पत्न ीसोबत बसमध्ये चढत असतांना गर्दीचा फायदा घेत चोरट्यांनी त्यांच्या पॅन्टच्या खिशातून २० हजार रुपये चोरल्याची कबुली दिली. याप्रकरणी जिल्हापेठ पोलिसात गुन्हा दाखल केला आहे. त्यांची अंग व वाहनझडती घेतली असता, त्यांच्याकडे ३३ हजार ८३० रुपयांची रोकड पाच मोबाईल व कार असा एकूण साडेपाच लाखांचा मुद्देमाल जप्त केला.
एलसीबीने पर्दाफाश केलेल्या टोळीतील अहमद बेग कादर बेग याच्याविरुद्ध अमरावती येथे चार गुन्हे दाखल आहे. त्यामुळे प्रवास करतांना नागरिकांनी आपल्याजवळील मौल्यवान वस्तूंची काळजी घ्यावी. संशयास्पद इसम दिसल्यास डायल ११२ वर कॉल करुन माहिती द्यावी, तसेच पोलीसांना गर्दीच्या ठिकाणी पेट्रोलिंग करण्याच्या देखील सूचना दिल्या आहेत
